ٹیم انڈیا کے کپتان وراٹ کوہلی اورسینئر تیز گیندباز ایشانت شرما نے پیر کے روز کورونا ویکسین کی پہلی ڈوز لی۔ وراٹ نے سوشل میڈیا پر تصویر شیئر کرتے ہوئے اپنے مداحوں سے بھی جلد از جلد ویکسین لگانے کی اپیل کی۔
ہندوستان کے گیندباز ایشانت شرما نے بیوی پرتیما سنگھ کے ساتھ ویکسین لگوانے کی فوٹو سوشل میڈیا پر شیئر کرتے ہوئے کہا کہ میں سبھی فرنٹ لائن ورکرز کا شکرگزار ہوں۔ میری لوگوں سے اپیل ہے کہ وہ جلد از جلد ویکسین لگوائیں۔
وراٹ کوہلی سمیت اب تک انگلینڈ ٹور پر جانے والے چار کھلاڑیوں نے ویکسین لگوا لی ہے۔ ان سے پہلے نائب کپتان اجنکیا رہانے، امیش یادو اور ایشانت شرما نے بھی پہلی ڈوز لے لی تھی۔ وہیں شکھردھون نے بھی ویکسین لگوا لی ہے۔
وراٹ اور ان کی اہلیہ انوشکا شرما گزشتہ کچھ روز میں کورونا کے خلاف جنگ میں ملک کے باقی لوگوں کی حوصلہ افزائی بھی کررہے ہیں۔ تین دن پہلے انہوں نے لوگوں کی مدد کے لئے ایک فنڈ ریزنگ کمپین ’’ ان دز ٹوگیدر ‘‘ کی شروعات کی تھی ۔ اس مہم کے ذریعہ وراٹ اور انوشکا کراوڈ فنڈنگ کی مدد سے سات کروڑ روپئے جمع کرنے ہیں۔ دونوں نے خود اس میں دو کروڑ روپئے کا تعاون کیا ہے۔
وراٹ اور انوشکا اس مہم کے ذریعہ ابتک 3.6 کروڑ روپئے جمع کرچکے ہیں۔ اس رقم کو اے سی ٹی گرانٹس کو سونپا جائے گا۔ اس کے بعد اس رقم کا استعمال ضرورت مندوں کو آکسیجن، طبی سازوسامان اور مین پاور اور ویکسین کی سہولیات پہنچانے کے لئے ہوگا۔
(یو این آئی)
