پاکستان سپر لیگ کے چھٹے سیزن کا رنگا رنگ آغاز سنیچر کو کراچی کے نیشنل کرکٹ اسٹیڈیم میں ہو گیا۔ ایونٹ کے ابتدائی میچ سے قبل رنگا رنگ افتتاحی تقریب منعقد ہوئی۔ ایونٹ کے افتتاحی میچ میں کنگز کے کپتان عماد وسیم نے ٹاس جیت کر گلیڈی ایٹرز کو پہلے بیٹنگ کی دعوت دی۔
ابتدا سے ہی کراچی کنگز نے اپنے فیصلے کو درست ثابت کرنے کی کوشش کی، جہاں 6 رنز پر ہی ٹام بینٹن کیچ آؤٹ ہوگئے۔ اس کے بعد 7 رنز بنانے والے سرفراز احمد بھی 17 کے مجموعی اسکور پر ایک آسان بال پر کیپر کو کیچ دے بیٹھے۔
صائم ایوب کے ساتھ یونیورس باس کرس گیل نے ٹیم کو 55 کے مجموعی اسکور تک پہنچایا جہاں 8 رنز بنانے والے صائم بھی پویلین لوٹ گئے۔ 24گیندوں پر 39 رنز کی اننگز کھیلنے والے کرس گیل 68 کے مجموعی اسکور پر گرنے والی کوئٹہ کی چوتھی وکٹ بنے۔
بعد ازاں اعظم خان کے 17، قیس احمد کے 16 اور بین کٹنگ کے 11 رنز کی بدولت کوئٹہ کی ٹیم 121 رنز تک پہنچ سکی جہاں کراچی نے اسے آل آؤٹ کردیا۔ کنگز کی جانب سے ارشد اقبال نے 3 اور وقاص مقصود نے 2 شکار کیے جبکہ عماد وسیم، محمد عامر، عامر یامین اور ڈینئل کرسچن کے حصے میں ایک ایک وکٹ آئی۔
کوئٹہ کی ٹیم کی جانب سے دیئے گئے 122 رنز کے ہدف کے تعاقب میں گلیڈی ایٹرز کے محمد حسنین نے 4 کے مجموعی اسکور پر ہی شرجیل خان کو ایل بی ڈبلیو آؤٹ کردیا۔ دوسری وکٹ پر جو کلارک اور بابر اعظم نے 55 رنز جوڑے، جبکہ 59 پر 46 رنز کی برق رفتار اننگز کھیلنے والے جو کلارک آؤٹ ہوگئے۔ بابر اعظم نے کولن انگرام کے ہمراہ ٹیم کا اسکور 87 رنز پر پہنچایا جہاں وہ بھی محمد حسنین کا شکار ہوگئے۔
بعد ازاں ایسے لگا جیسے میچ کوئٹہ کے ہاتھ سے نکل ہی گیا، کیونکہ کراچی کنگز کے محمد نبی نے 14 گیندوں پر 2 چوکوں اور 2 چھکوں کی مدد سے 30 رنز کی ناقابلِ شکست اننگز کھیل کر اپنی ٹیم کا فاتحانہ آغاز کیا۔ بہترین بولنگ پرفارمنس پر کراچی کنگز کے ارشد اقبال کو مین آف دی میچ قرار دیا گیا۔
