سوشل میڈیا اکاؤنٹس پر شاہد آفریدی نے اپنی بیٹی کے ہمراہ فلسطین کا جھنڈا اٹھائے تصاویر شیئر کیا ہے، جس میں انھوں نے لکھا ہے کہ یہاں دور بہت دور ہیں ہم، مگر یہ دل ہمارے دھڑکتے ہیں تمہارے ساتھ، اسی طرح جس طرح سے ہمارے آبا اور ان کے آبا کے دل، تمہارے اجداد کے ساتھ دھڑکتے تھے۔
شاہد آفریدی نے مزید لکھا کہ دکھ، اندیشہ، خوف اور فکر کی تمام گرہیں عارضی ہیں، غم کی تمام راہیں عارضی ہیں۔ شاہد آفریدی کے پیغام کو لاکھوں لوگ پسند کررہے ہیں۔
طویل عرصے سے جاری اسرائیلی فلسطین تنازع کا موجودہ آغاز گذشتہ ہفتے اسرائیلی سرحد اور غزہ پٹی سے شروع ہوا تھا۔ جاری تشدد کے نتیجے میں دنیا بھر میں اسرائیل اور فلسطین دونوں کی حمایت میں مظاہرے ہوئے۔ مظاہرین نے عالمی برادری سے فوری اقدامات کرنے کا مطالبہ کیا ہے۔
واضح رہے کہ اسرائیل اور فلسظین تنازعات کی وجہ سے اب تک 61 بچوں سمیت 200 سے زیادہ لوگ جاں بحق ہوچکے ہیں اور ایک ہزار کے قریب زخمی ہوگئے ہیں۔ دوسری جانب اسرائیل میں 10 افراد ہلاک اور 50 دیگر شدید زخمی ہوگئے ہیں۔
