ممبئی: پرتھوی کو چوٹ سے ٹھیک ہونے میں تین سے چار مہینے لگ سکتے ہیں، جس کا مطلب ہے کہ وہ یقینی طور پر ہندوستان کے 2023-24 کے گھریلو سیزن کا ایک بڑا حصہ بننے کا موقع کھو دیں گے جو یکم اکتوبر کو راجکوٹ میں ایرانی کپ کے ساتھ شروع ہونے جا رہا ہے۔شا کو ڈرہم کے خلاف ایک روزہ چیمپئن شپ میچ میں نارتھمپٹن شائر کے لئے کھیلتے ہوئے چوٹ لگی تھی۔ ہندوستانی کرکٹ کنٹرول بورڈ (بی سی سی آئی) نے کہا کہ پرتھوی شا تین سے چار ماہ تک کرکٹ سے دور رہیں گے۔ اس دوران وہ ری ہیب میں رہیں گے۔ بی سی سی آئی کے ایک عہدیدار نے بتایا کہ پرتھوی کے زخمی ہونے کے بعد ایم آر آئی کیا گیا۔ معلوم ہوا کہ ان کے لیگامنٹ میں چوٹ آئی ہے۔ اس وقت میڈیکل ٹیم شا کے علاج کے حوالے سے تمام ممکنہ متبادل پر غور کر رہی ہے اور سرجری ہی آخری متبادل ہونے کا امکان ہے۔
ممبئی کرکٹ ایسوسی ایشن (ایم سی اے) کے ایک عہدیدار نے ای ایس پی این کرک انفو کو بتایا کہ شا 16 اکتوبر سے سید مشتاق علی ٹرافی کے ساتھ شروع ہونے والے محدود اووروں کے مقابلوں میں نہیں کھیلیں گے۔ یہ چوٹ شا کے لیے بڑا دھچکا ہے کیونکہ وہ بہت اچھی کارکردگی کا مظاہرہ کر رہے تھے اور آگے بڑھ رہے تھے۔ وہ ایک روزہ مقابلے میں چار اننگز میں 429 رنز بنا کر سب سے زیادہ رنز بنانے والے کھلاڑی تھے۔
واضح رہے کہ پرتھوی نے نارتھمپٹن شائر کے لیے ایک میچ میں ناٹ آؤٹ 125 رن بنائے تھے۔ اس سے قبل انہوں نے 244 رن کی شاندار اننگز کھیلی تھی۔ پرتھوی 2021 سے ہندوستانی کرکٹ ٹیم سے دور ہیں۔ انہوں نے ٹیم انڈیا کے لیے اپنا آخری میچ جولائی 2021 میں سری لنکا کے خلاف کھیلا تھا۔ شا جولائی میں دلیپ ٹرافی کے لیے ویسٹ زون کا حصہ تھے جس کے بعد وہ نارتھنٹس کے لیے ایک روزہ مقابلے کھیلنے کے لیے انگلینڈ گئے۔ شا آخری بار فروری میں نیوزی لینڈ کے خلاف ہوم ٹی 20کے لیے ہندوستانی ٹیم کاحصہ تھے اور اس کے بعد آئی پی ایل 2023 میں دہلی کیپٹلز کے لیے اچھی کارکردگی کا مظاہرہ نہیں کیا تھا جس میں انہوں نے 14 میچوں میں سے صرف آٹھ میچوں میں 106 رنز بنائے۔
یہ بھی پڑھیں:Ben Stokes بین اسٹوکس نے ون ڈے کرکٹ میں 3000 سے زیادہ رن مکمل کئے
شا نے حال ہی میں اپنی واپسی پر خوشی کا اظہار کرتے ہوئے کہا تھا کہ میں اگلے موسم گرما میں نارتھمپٹن شائر واپس جانے کے لیے بہت پرجوش ہوں۔ اگرچہ کھیل جلدی ختم ہو گیا، میں نے وہاں اپنے وقت کا بہت لطف اٹھایا۔ یہ ایک بہت اچھا کلب ہے اور وہاں موجود ہر شخص نے میرا استقبال کیا۔ میں واپسی کے لئے انتظار نہیں کر سکتا۔ میرا مقصد ہمیشہ ٹیم کو میچ جیتنے میں مدد کرنا ہوتا ہے اور اس بار زخمی ہونا میرے لیے بہت مایوس کن تھا۔
یو این آئی
