نئی دہلی:وزیر اعظم نریندر مودی نے سوشل میڈیا پلیٹ فارم پر لکھاکہ ہردے چھیڈا، انوش اگروال، سدیپتی ہجیلا اور دیویاکریت سنگھ نے ایک ٹیم کے طور پر بے مثال مہارت کا مظاہرہ کیا اور بین الاقوامی پلیٹ فارم پر ہمارے ملک کو عزت بخشی۔ میں اس تاریخی کامیابی پر ٹیم کو تہہ دل سے مبارکباد پیش کرتا ہوں۔‘
واضح رہے کہ ہندوستانی گھڑسوار ٹیم نے آج ایشیائی کھیلوں میں شاندار کارکردگی کا مظاہرہ کیا اور 209.205 کے اسکور کے ساتھ طلائی تمغہ جیتا۔
دوسری طرف ہندوستان کی 17 سالہ نیہا ٹھاکر نے منگل کو منعقدہ ڈنگی پال سیلنگ مقابلے میں چاندی کا تمغہ جیت لیا ہے۔چین میں جاری 19ویں ایشیائی کھیلوں میں آج ہندوستان کی 17 سالہ سیلر نیہا ٹھاکر نے لڑکیوں کی ڈنگی آئی ایل سی اے4 ایونٹ میں 11 ریسوں میں کل 27 پوائنٹس کے ساتھ چاندی کا تمغہ جیتا۔
یہ بھی پڑھیں:Asian Games 2023 ایشین گیمز میں ہندوستانی کھلاڑیوں کی جارہانہ کارکردگی
کشتی رانی میں ہندوستان کا یہ پہلا تمغہ ہے۔ اس کے ساتھ ہی ایشیائی کھیلوں میں ہندوستان کے کل تمغوں کی تعداد 12 ہو گئی ہے۔تھائی لینڈ کی نوپاسورن خنبونجان نے 16 پوائنٹس کے ساتھ گولڈ میڈل جیتا جبکہ سنگاپور کی کیرا میری کارلائل نے 28 پوائنٹس کے ساتھ کانسے کا تمغہ جیتا۔ایشیائی کھیلوں کے دوسرے مقابلوں میں ہندوستانی کھلاڑیوں کی جانب سے شاندار کارکردگی کا سلسلہ جاری ہے۔
یواین آئی
