IPL 2023 Eliminator Match ممبئی اور لکھنؤ کے درمیان ایلیمینیٹر مقابلہ آج، ہارنے والی ٹیم ہوگی ٹورنامنٹ سے باہر

آئی پی ایل 2023 کے ایلیمینیٹر میچ میں آج لکھنؤ سپر جائنٹس اور ممبئی انڈینز آمنے سامنے ہوں گے۔ جیتنے والی ٹیم کوالیفائر 2 میں داخل ہو جائے گی جب کہ ہارنے والی ٹیم ٹورنامنٹ سے باہر ہو جائے گی۔ وہیں چنئی سپر کنگز گجرات ٹائٹنز کو شکست دے کر فائنل میں جگہ بنا لی ہے۔ Mumbai Indian vs Lucknow Super Giants

چنئی: آئی پی ایل 2023 کا ایلیمینیٹر مقابلہ بدھ کو لکھنؤ سپر جائنٹس اور ممبئی انڈینز کے درمیان کھیلا جائے گا۔ یہ میچ ایم اے چدمبرم اسٹیڈیم میں شام 7:30 بجے سے کھیلا جائے گا۔ اس میچ میں ہارنے والی ٹیم کا اس سیزن سے سفر ختم ہو جائے گا جب کہ جیتنے والی ٹیم کو فائنل میں پہنچنے کے لیے کوالیفائر-1 کی ہارنے والی ٹیم گجرات ٹائٹنز سے مقابلہ کرنا ہوگا۔ دونوں ٹیمیں اس بڑے میچ کے لیے تیار ہیں اور پریکٹس کے ساتھ ساتھ اپنی حکمت عملی بنانے میں بھی مصروف ہیں۔ روہت شرما کی قیادت میں ممبئی انڈینز کی ٹیم گذشتہ کئی میچوں سے اچھا کھیل رہی ہے۔ ایسے میں کرنال پانڈیا کی قیادت میں لکھنؤ سپر جائنٹس کے لیے اسے شکست دینا آسان نہیں ہوگا۔ حالانکہ ریکارڈ لکھنؤ سپر جائنٹس کے حق میں ہیں۔

ممبئی انڈینز کے تمام اہم بلے باز فارم میں واپس آ چکے ہیں۔ روہت شرما رنز بنا رہے ہیں، ایشان کشن اور سوریہ کمار یادیو اچھی فارم میں ہیں۔ ٹیم ڈیوڈ اور کیمرون گرین بھی اپنا کردار ادا کر رہے ہیں۔ تلک ورما نے بھی اپنے بلے سے سب کو متاثر کیا ہے۔ جوفرا آرچر اور جسپریت بمراہ کی عدم موجودگی کے باوجود، ممبئی انڈینز نے کپتان روہت شرما کی بدولت پلے آف میں جگہ بنا لی ہے۔ کہیں نہ کہیں ممبئی انڈینس کی کمزوری اس کی بولنگ ہے۔ اس میچ میں ٹاس کا کردار بھی اہم ہوگا۔ ممبئی انڈینز کے کپتان روہت ٹاس جیت کر پہلے بولنگ کرنا چاہیں گے کیونکہ وہ جانتے ہیں کہ اگر ٹیم کے پاس ایسی بیٹنگ لائن اپ ہے تو وہ 200+ کا ہدف آسانی سے حاصل کر سکتی ہے۔ ممبئی کی بولنگ ایک بار پھر تجربہ کار اسپنر پیوش چاولہ کے ہاتھ میں ہوگی، جو 20 وکٹوں کے ساتھ ٹیم کے سب سے کامیاب بولر ہیں۔

فارم میں واپس آنے والی ممبئی انڈینس کی ٹیم سے لکھنؤ سپر جائنٹس پر قابو پانا آسان نہیں ہے۔ اگرچہ ریکارڈ بات کریں تو دونوں ٹیموں کے درمیان اب تک 3 میچ کھیلے جا چکے ہیں اور تینوں میچوں میں لکھنؤ سپر جائنٹس نے کامیابی حاصل کی ہے۔ لیکن آپ کو بتاتے چلیں کہ یہ تمام میچ لیگ مرحلے میں کھیلے گئے تھے۔ لکھنؤ کی ٹیم ایک متوازن ٹیم دکھائی دیتی ہے۔ بولنگ کی کمان ایک بار پھر نوجوان اسپنر روی بشنوئی کے ہاتھ میں ہوگی، جو 16 وکٹوں کے ساتھ ٹیم کے سب سے کامیاب بولر ہیں۔ کے ایل راہل کے زخمی ہونے کے بعد کرونال نے اچھی کپتانی کی ہے اور بلے بازوں نے بھی اچھی کارکردگی کا مظاہرہ کیا ہے۔ مارکس اسٹوئنس، کائل مائرز اور نکولس پورن سے ایک بار پھر اچھی اننگز کھیلنے کی امید کی جائے گی۔ لکھنؤ سپر جائنٹس اچھی طرح جانتے ہیں کہ ممبئی انڈینس کی کمزوری ان کی بولنگ ہے، ایسے میں ایل ایس جی کے بلے باز ممبئی انڈینس کے کمزور بولنگ اٹیک کا فائدہ اٹھانا چاہیں گے۔