ممبئی انڈین کے سلامی بلے باز ایشان کشن کی ناٹ آؤٹ 81 رنز کی بہترین اننگ کے ساتھ 20 اوور میں پانچ وکٹ پر 177 کا مضبوط اسکور بنایا تھا لیکن دہلی نے 18.2 اوور میں چھ وکٹ پر 179 رنز پر حیرت انگیز فتح حاصل کی۔اکشر پٹیل نے صرف 17 گیندوں پر ناٹ آؤٹ 38 رنز میں دو چوکے اور تین چھکے لگائے جبکہ للت نے 38 گیندوں پر ناٹ آوٹ 48 رنز میں چار چوکے اور دو چھکے لگائے۔ مضبوط ہدف کا تعاقب کرتے ہوئے دہلی نے 3.3 اوور میں 30 رنز کی مظبوط شروعات کی لیکن اس کے بعد اس کی وکٹیں وقفے وقفے سے گرتی رہیں۔ پرتھوی شا نے 24 گیندوں میں چار چوکوں اور دو چھکوں کی مدد سے 38 رن کی عمدہ اننگ کھیلی۔ ٹم سیفرٹ نے 14 گیندوں میں چار چوکوں کی مدد سے 21 رنز بنائے۔MI vs DC IPL 2022
دہلی نے 14ویں اوور تک 104 رنز پر اپنے چھ وکٹ گنوا دیے۔ اس وقت تک ممبئی جیت کی پوزیشن میں نظر آرہی تھی لیکن اکشر اور للت نے اس کے بعد کمال کی بلے بازی کرتے ہوئے جیت ممبئی کے ہاتھوں سے چھین کر دہلی کی جھولی میں ڈال دی۔ کلدیپ یادو کو میچ کا بہترین کھلاڑی قرار دیا گیا۔ اس سے قبل ایشان نے کپتان روہت شرما کے ساتھ 67 رنز کی اوپننگ شراکت داری کی۔ روہت کے آؤٹ ہونے کے بعد ایشان نے ممبئی کی پوری اننگ کو سنبھالے رکھا۔ روہت نے 32 گیندوں میں چار چوکوں اور تین چھکوں کی مدد سے 41 رنز بنائے جبکہ ایشان صرف 48 گیندوں پر 11 چوکوں اور دو چھکوں کی مدد سے 81 رنز بنا کر ناٹ آؤٹ پویلین لوٹے۔ تلک ورما نے تین چوکوں کی مدد سے 22 اور ٹیم ڈیوڈ نے ایک چھکا کی مدد سے 12 رنز بنائے۔ کشن نے روہت کے ساتھ پہلے ایک اچھی اوپننگ شراکت داری کی اور پھر آخر میں فنشر کا کردار بھی ادا کیا۔ دہلی کی جانب سے چائنا مین گیند باز کلدیپ یادو 18 رن پر تین وکٹ لے کر سب سے کامیاب گیند باز رہے۔ دہلی کی ٹیم کے کلدیپ آج ایک مختلف رنگ میں نظر آئے اور انہوں نے کئی اہم وکٹیں حاصل کیں۔
