آئی پی ایل 13 کا آخری لیگ میچ آج ممبئی انڈینز اور سن رائزرس حیدرآباد کے مابین کھیلا جائے گا۔ یہ میچ جتنا حیدر آباد کے لیے اہم ہے اتنا ہی کولکاتا نائٹ رائیڈرس کے لیے بھی، کیوں کہ حیدر آباد کی شکست کولکاتا کو پلے آف میں پہنچا سکتی ہے لیکن اگر سن رائیزرس حیدر آباد فتح حاصل کر لیتی ہے تو کولکاتا نائٹ رائیڈرس کا آئی پی ایل 2020 سفر ختم ہوجائے گا۔
ممبئی انڈینز ٹیم پہلے ہی پلے آف میں پہنچ چکی ہے۔ وہ 18 پوائنٹس کے ساتھ پوائنٹس ٹیبل کی سرفہرست ٹیم ہے۔ ممبئی انڈینز چاہے گی کہ وہ اپنی جیت کی مہم جاری رکھے۔
دوسری جانب سن رائیزرس حیدرآباد کے لیے آج کا میچ آر یا پار کی جنگ ہے اور ان کے لیے صرف اسی صورت میں پلے آف میں جانا ممکن ہوگا جب وہ جیت حاصل کرتی ہے لیکن آخر میں نیٹ رن ریٹ فیصلہ کن کردار ادا کرے گا۔ حیدرآباد کو اس میچ میں جیت کے ساتھ ساتھ اپنے رن ریٹ پر بھی نظر رکھنی ہوگی۔
تین ٹیموں (چنئی سُپر کنگز، کنگز الیون پنجاب اور راجستھان رائلز) کا سفر آئی پی ایل میں ختم ہوگیا ہے۔ پنجاب چھٹے، چنئی ساتویں اور راجستھان آٹھویں نمبر پر ہے۔ تینوں ٹیموں نے 12–12 پوائنٹس حاصل کئے لیکن رن ریٹ کی بنیاد پر ان کی جگہیں طے کی گئیں۔
گزشتہ روز دہلی کیپیٹلز نے رائل چیلنجرز بنگلور کو شکست دے کر پوائنٹس ٹیبل میں دوسرا مقام حاصل کیا ہے اور پلے آف میں ممبئی انڈینز سے نبردآزما ہوگی۔
اگر آج حیدرآباد ٹیم جیت جاتی ہے تو کولکاتا نائٹ رائیڈرس، رائل چیلینجرز بنگلور اور سن رائیزرس حیدرآباد کے 14-14 پوائنٹس ہوجائیں گے جس میں سے دو ٹیمیں نیٹ رن ریٹ کی بنیاد پر پلے آف میں پہنچ جائیں گی۔
حیدرآباد نے اپنے گزشتہ میچ میں رائل چیلنجرز بنگلور کو 5 وکٹوں سے شکست دے کر پلے آف کی امیدوں کو برقرار رکھا۔ اس جیت نے حیدرآباد کے حوصلے کو فروغ دیا ہے کیونکہ اس کا رن ریٹ بڑھ گیا ہے جبکہ پلے آف میں حصہ لینے والی دیگر ٹیموں کا رن ریٹ منفی ہے۔
سن رائیزرس حیدرآباد کے کپتان ڈیوڈ وارنر نے اعتماد کا اظہار کیا کہ ان کی ٹیم ممبئی انڈینز کے خلاف میچ میں ضرور کامیابی حاصل کرے گی لیکن حیدرآباد کو ایسی ٹیم کے خلاف بہترین کارکردگی کا مظاہرہ کرنا ہوگا جس کی بلے بازی اور گیند بازی دونوں میں زبردست طاقت ہے۔
