راسخ سلام کا کولگام سے آئی پی ایل تک کا سفر

ریاست جموں و کشمیر کی جانب سے آئی پی ایل میں کھیلنے والے راسخ سلام تیسرے کھلاڑی ہیں، ان سے قبل پرویز رسول اور منظور ڈار آئی پی ایل کی نمائندگی کر چکے ہیں۔

ممبئی انڈینس کی جانب سے راسخ سلام کو آئی پی ایل میں اپنا پہلا میچ کھیلنے کا موقع ملا۔ 17 برس کے سلام نے پہلے مقابلے میں شروعاتی تین اوورز میں زیادہ رن خرچ نہیں کئے لیکن آخری اوور میں رشبھ پنت نے ان کی پٹائی کر دی۔

راسخ سلام کے لیے آئی پی ایل تک کا سفر آسان نہیں تھا۔ کشمیر کے حالات سے ابھر کر یہاں کا سفر کرنا ان کے لیے کافی مشکل بھرا رہا ہے۔لیکن راسخ سلام نے ثابت کر دیا کہ وادی کے نوجوان کرکٹ کے میدان میں کسی سے پیچھے نہیں ہیں۔

راسخ سلام کو ٹیم انڈیا کے سابق تیز گیندباز ظہیر خان نے کیپ سونپی۔وجے ہزارے ٹرافی میں کھیلے گئے ایک مقابلے کے دوران ممبئی انڈینس کے ایک رکن کی نظر راسخ سلام پر پڑی تھی۔انہوں نے راسخ سلام کو ٹرائل کے لیے بلایا۔

آئی پی ایل 2018 کی نیلامی میں ممبئی انڈینس نے راسخ سلام کو 20 لاکھ روپئے میں اپنی ٹیم شامل کر لیا۔

حالانکہ راسخ سلام اپنے پہلے مقابلے میں اپنی پہچان چھوڑنے میں بھلے ہی ناکام رہے لیکن ان کی گیندبازی کرکٹ ماہرین کو متاثر کرتی ہے۔ جس کی بنا پر کہا جا سکتا ہے کہ راسخ سلام ممبئی انڈینس کے لیے فائدے مند ثابت ہو سکتے ہیں۔