بھارتی کھلاڑی رشبھ پنت نے آئی سی سی پلیئر آف دی منتھ کا یہ اعزاز اپنے نام کرلیا ہے۔ آئی سی سی نے یہ فیصلہ کیا ہے کہ ہر مہینے اس طرح کا اعزازی ایوارڈ دیا جائے۔ مرد اور خواتین کرکٹرز کی بہترین پرفارمنس کو اس سے پہچانا جائے گا۔ ان ایوارڈز کا اعلان پہلی بار کیا گیا ہے، جس میں بھارتی وکٹ کیپر بلے باز رشبھ پنت نے کامیابی حاصل کی ہے۔ آسٹریلیا کے خلاف دو ٹیسٹ میں اپنی کارکردگی کی وجہ سے بھارتی بلے باز رشبھ پنت نے جنوری 2021 کے لیے آئی سی سی پلیئر آف دی منتھ کا اعزاز حاصل کیا۔ انہوں نے سڈنی میں 97 اور برسبین میں ناقابل شکست 89 رنز بنائے ہیں۔ ان کی اننگز کی بنیاد پر بھارت نے تاریخی جیت درج کی تھی۔
رشبھ پنت کے علاوہ جنوبی افریقہ کی شبنم اسماعیل نے جنوری کے مہینے میں تین ون ڈے اور دو ٹی۔20 انٹرنیشنل میں عمدہ کارکردگی کے لئے آئی سی سی ویمن پلیئر آف دی منتھ کا خطاب جیتا۔ پاکستان کے خلاف ون ڈے سیریز جیتنے والی جنوبی افریقہ کی خواتین ٹیم کے لئے شبنم اسماعیل نے سات وکٹیں حاصل کیں۔
جنوری کے مہینے میں کچھ سنسنی خیز کرکٹ دیکھنے کو ملی۔ اسی وجہ سے انٹرنیشنل کرکٹ کونسل نے رشبھ پنت، جو روٹ اور پال اسٹرلنگ کو نامزد کیا تھا، لیکن ووٹنگ کے بعد رشبھ پنت کو فاتح قرار دیا گیا ہے۔
