انگلینڈ نے بھارت کے خلاف مانچسٹر کے اولڈ ٹریفورڈ میدان پر دس ستمبر سے شروع ہورہے پانچویں اور آخری ٹیسٹ میچ کے لئے وکٹ کیپر بلے باز جوس بٹلر اور لیفٹ آرم اسپنر جیک لیچ کو 16 رکنی ٹیم میں شامل کیا ہے۔
بٹلر اپنے دوسرے بچے کی پیدائش کے سبب چوتھے ٹیسٹ میچ سے باہر ہوئے تھے اور اب بچی مارگوٹ کی پیدائش کے بعد وہ آخری میچ کے لئے ٹیم میں واپسی کریں گے۔ وہیں لیچ پہلے دو ٹیسٹ میچوں کے لئے ٹیم کا حصہ تھے لیکن بعد میں تیسرے اور چوتھے میچ میں منتخب نہ ہونے کی وجہ سے انہیں سمر سیٹ کے گھریلو سیشن میں کھیلنے کے لئے ٹیم سے ریلیز کردیا گیا تھا۔
یہ بھی پڑھیں: کرکٹ میں لڑکیوں کی دلچسپی
لیچ کی ٹیم میں واپسی کا مطلب ہے کہ آخری ٹیسٹ میں تو لیچ معین علی کی جگہ لیں گے جو اوول میں کچھ خاص نہیں کرسکے تھے یا انگلینڈ دو اسپنروں کے ساتھ اتر سکتا ہے۔ اس درمیان بٹلر کے متبادل کے طورپر شامل کئے گئے وکٹ کیپر بلے با ز سیم بلنگس کو ٹیم سے ریلیز کردیا گیا ہے۔
خیال رہے کہ مانچسٹر کے اولڈ ٹریفرڈ میدان کی پچ پر روایت کے مطابق اسپن گیندبازی اہم کردار ادا کرتی ہے۔
یو این آئی
