اندور: بھارتی کرکٹ ٹیم مدھیہ پردیش کے شہر اندور پہنچ گئی۔ بھارت تین ون ڈے میچوں کی سیریز کا تیسرا میچ منگل کے روز اندور کے ہولکر اسٹیڈیم میں کھیلے گا۔ بھارت نیوزی لینڈ کے خلاف دو ون ڈے میچ جیت کر سیریز جیت لیا ہے۔ تین میچوں کی ون ڈے سیریز میں نیوزی لینڈ کو 2-0 سے شکست دینے کے بعد ٹیم انڈیا کی نظریں اب کلین سویپ پر ہیں۔ آخری ون ڈے کے بعد دونوں ٹیمیں تین ٹی ٹوئنٹی میچز کھیلیں گی۔ پہلا ٹی ٹوئنٹی 27 جنوری کو رانچی میں کھیلا جائے گا۔ بی سی سی آئی نے اندور کے نتن مینن کو بھارت اور نیوزی لینڈ کے درمیان ون ڈے میچ کے لیے آن فیلڈ امپائر مقرر کیا ہے۔ 40 برسوں میں پہلی بار ایک اندوری امپائر کسی بین الاقوامی ون ڈے میچ میں میدان پر ایمپائرنگ کرتے ہوئے نظر آئیں گے۔
انٹرنیشنل کرکٹ کونسل (آئی سی سی) کے ایلیٹ پینل میں شامل ملک کے واحد امپائر نتن مینن شہر میں منعقدہ پہلے تین بین الاقوامی میچوں میں تھرڈ امپائر رہے ہیں۔ اس میں نیوزی لینڈ اور بنگلہ دیش کے خلاف ٹیسٹ میچز کے ساتھ ساتھ سری لنکا کے خلاف ٹی ٹوئنٹی میچ بھی شامل ہیں۔ ان کے والد نریندر مینن اندور میں دو بین الاقوامی میچوں کے دوران تھرڈ امپائر بھی رہ چکے ہیں۔ اندور کے سدھیر اسنانی ایک ون ڈے میچ میں ٹی وی امپائر رہ چکے ہیں۔ اس میچ میں وریندر سہواگ نے ڈبل سنچری بنائی۔
