بھارت کے خلاف یک روزہ سیریز کے دوسرے میچ میں فیلڈنگ کے دوران آسٹریلیا کے سلامی بلے باز ڈیوڈ وارنر کے زخمی ہونے اور ان کے متبادل کے طور پر شامل کئے گئے ول پکوسکی کے انڈیا اے کے خلاف پہلے پریکٹس میچ کے دوران زخمی ہونے کے بعد مارکس ہیرس کو پہلے ٹیسٹ کے لیے ٹیم میں شامل کیا گیا ہے۔
مارکس ہیرس نے آسٹریلیا کے لیے اب تک 9 ٹیسٹ میچ کھیلے ہیں جس میں انہوں نے 24.06 کے اوسط سے 385 رنز بنائے ہیں۔ حال ہی شیفیلڈ شیلڈ گیمز میں بھی انہوں نے جنوبی آسٹریلیا کے خلاف 239 رنز بنائے تھے۔
آسٹریلیائی ٹیم کے سلیکٹر ٹریوس ہونس نے کہا کہ 'حال ہی میں کھلاڑیوں کے زخمی ہونے کے بعد ہم خوش قسمت ہیں کہ مارکس ہیرس جیسے کھلاڑی کو ٹیسٹ ٹیم میں شامل کرنے میں کامیاب رہے۔
ہیرس اس سیزن میں وکٹوریہ کی جانب سے کھیلتے ہوئے شاندار فارم میں ہیں اور انہیں بھارت کے خلاف دونوں پریکٹس میچ میں کھیلنے کا موقع ملا ہے۔
ہونس نے کہا کہ 'ڈیوڈ وارنر کے پہلے ٹیسٹ میچ سے باہر ہونے پر ہم مایوس ہیں۔ ہمیں امید ہے کہ وارنر باکسنگ ڈے میچ تک ٹیم کے لیے دستیاب ہوں گے۔
(یو این آئی رپورٹ)
