بنگلورو: بھارتی گیند باز ہرشل پٹیل نے انکشاف کیا ہے کہ اپریل 2022 میں صرف ایک ہفتے کے اندر ان کی بہن کی موت اور بیٹے کی پیدائش نے انہیں غم اور خوشی کے ملے جلے جذبات سے بھر دیا تھا، لیکن اس مشکل وقت میں کنبہ کا ساتھ ہونا ان کے کام آیا۔ ہرشل نے اپنی زندگی کے مشکل لمحات کے بارے میں رائل چیلنجرز بنگلور (آر سی بی) کے پوڈ کاسٹ پر کہا، ’’جب میری بہن کا انتقال ہوا تو میں ایک ہفتہ تک غم میں ڈوبا رہا تھا۔ وہ 9 اپریل (2022) کو ہمیں چھوڑ کر چلی گئیں۔ میں قرنطینہ میں تھا۔ میں اپنے بھانجے اور بھانجی اور گھر میں موجود ہر شخص سے (فون پر) بات کر رہا تھا۔ میں جانا چاہتا تھا، انہیں گلے لگانا اور ان کے ساتھ رونا چاہتا تھا، لیکن ہم یہ سب فون پر کر رہے تھے۔ کیونکہ ہمارے پاس کوئی دوسرا راستہ نہیں تھا۔ پھر سات دن بعد میرا بیٹا پیدا ہوا۔ میں ایک ہفتہ یا دس دن تک بالکل بے حس ہو گیا تھا۔ مجھے نہیں معلوم تھا کہ میں کیا محسوس کر رہا ہوں۔ مجھے خوش ہونا چاہیے یا غمگین؟ سارے احساسات ایک ایک کر کے آتے رہے تھے۔
ہرشل نے کہا، "کئی بار میں اپنے کمرے میں چھپ کر دن میں تین سے چار بار روتا تھا۔ پھر میں نے اپنے بیٹے کو فیس ٹائم (ویڈیو کال) پر دیکھا اور بہت خوشی محسوس کی۔ جب آپ ایسے قطبی جذبات میں گھرے ہوتے ہیں تو یہ آپ کو بہت تھکا دیتا ہے۔ ہرشل بتاتا ہے کہ اس مشکل وقت میں وہ اپنے گھر والوں کو طاقت دیتے تھے اور گھر والے بھی اسی طرح انہیں ہمت دیتے تھے۔ انہوں نے کہا، "جب کچھ اچھا یا برا ہوتا ہے تو میں اس وقت مستحکم رہنا چاہتا ہوں ۔ مجھے ان دو ہفتوں میں اس چیز کو عملی جامہ پہنانے کا بہترین موقع ملا۔ میں نے اپنے اہل خانہ کی ہر ممکن مدد کرنے کی کوشش کی اور وہ مجھے تسلی دیتے تھے۔ ان سب کے ساتھ خود شناسی کا ایک بوجھ ہوتا ہے۔ اپنے ساتھ ایماندار نہ ہونا حماقت ہے۔ اگر آپ مسلسل اپنے آپ سے باہر وجوہات تلاش کرنے کی کوشش کر رہے ہیں کہ آپ خوش کیوں نہیں ہیں یا آپ کامیاب کیوں نہیں ہو رہے ہیں، تو آپ صحیح سمت میں نہیں بڑھ رہے ہیں۔
میں صرف ان چیزوں سے متاثر نہیں ہونا چاہتا جو میرے قابو سے باہر ہیں۔ جب کچھ برا ہوتا ہے تو میں وہ شخص بننا چاہتا ہوں جس کے کندھوں پر لوگ سر رکھ سکیں۔" انڈین پریمیئر لیگ (آئی پی ایل) کے 2021 سیزن میں ہرشل بہترین بولر تھے۔ آر سی بی نے 2022 کے سیزن سے پہلے نیلامی میں انہیں دوبارہ حاصل کرنے کے لیے 10.75 کروڑ روپے خرچ کیے، جو ہرشل کے لیے ایک خوشگوار حیرت تھی۔ ہرشل نے نیلامی کے بارے میں کہا، ’’بہت سے لوگوں نے مجھ سے پوچھا کہ میری توقعات کیا تھیں۔ میں نے کہا کہ میں شاید چھ یا سات کروڑ کی توقع کر رہا تھا کیونکہ میں نے پچھلے تین یا چار سیزن میں اپنی کیٹیگری کے کرکٹرز کو دیکھا تھا اور ان میں سے کسی کو بھی بڑی نیلامی میں اس سے زیادہ نہیں ملا۔ میں نے سوچا کہ میں محفوظ طریقے سے 5-6-7 کروڑ کمانے کی امید کر سکتا ہوں، لیکن آس پاس کے بہت سے لوگوں نے مجھے بتایا کہ یہ دوہرے اعداد میں جا سکتا ہے۔ جب یہ ہوا تو میں حیران رہ گیا۔ مجھے اب بھی یاد ہے کہ سن رائزرس حیدرآباد اور آر سی بی میرے لیے لڑ رہے تھے اور بولی 10 کروڑ سے زیادہ چلی گئی تھی۔ میں واقعی میں واپس آکر آر سی بی کے لیے کھیلنا چاہتا تھا۔
یہ بھی پڑھیں: IPL Mega Auction: ایک سیزن کی بہتر کارکردگی اور ہوگئی پیسوں کی بارش
انہوں نے کہا کہ 'میں نے اپنے آپ سے سوچا، ٹھیک ہے، کافی ہے۔ مجھے ایک اور بولی نہیں چاہیے، مجھے جو رقم ملی ہے اس سے میں خوش ہوں، میں آر سی بی میں واپس جانا چاہتا ہوں۔" ہرشل نے کہا کہ اس رقم نے انہیں زندگی میں بہت سے فیصلے لینے کی آزادی دی ہے۔ انہوں نے کہا، "یہ مجھے اختیارات، آزادہ دیتا ہے ۔ لہذا اگر میں اس قیمت پر کھیلنا جاری رکھتا ہوں یا اگر میں اس قیمت پر کھیلنا جاری نہیں رکھتا ہوں تو، مجھے نہیں لگتا کہ مجھے اپنی زندگی میں کوئی بھی فیصلہ اس بنیاد پر کرنے کی ضرورت ہے کہ مجھے کتنا پیسہ مل رہا ہے؟ میں کوئی غیر معمولی شخص نہیں ہوں۔ مجھے واقعی بہت زیادہ پیسوں کی ضرورت نہیں ہے، لیکن پیسہ آزادی کا ایک ذریعہ ہے۔ میں اسے اسی طرح دیکھتا ہوں۔"
یو این آئی
