دوسرے ٹیسٹ میچ کے پانچویں دن پاکستان کو جیت کے لیے 9 وکٹیں درکار تھیں جبکہ ویسٹ انڈیز کو جیتنے کے لیے 280 رنز بنانے تھے۔ لیکن میزبان ٹیم محض 219 رنز ہی بنا سکی۔
پاکستان کی جانب سے دوسری اننگز میں شاہین شاہ آفریدی 4، نعمان علی 3 اور حسن علی نے 2 وکٹ حاصل کیں۔ ویسٹ انڈیز کے جیسن ہولڈر نے سب سے زیادہ 47 رنز بنائے۔
اس سے قبل پاکستان نے 9 وکٹوں کے نقصان پر 302 رنز بنانے کے بعد پہلی اننگز ڈکلیئر کردی تھی۔ فواد عالم نے 124 اور کپتان بابر اعظم نے 75 رنز بنائے تھے۔
ویسٹ انڈیز نے پیر کو اپنی پہلی اننگز کی برتری 39 رنز پر تین وکٹوں سے شروع کی۔ بیٹنگ میں اچھی کارکردگی دکھانے کے بعد پاکستان کی بولنگ بھی شاندار تھی۔ شاہین آفریدی کی چھ وکٹوں کی مدد سے پاکستان نے پہلی اننگز میں میزبان ٹیم کو 150 رنز پر آؤٹ کردیا۔
آفریدی کے علاوہ محمد عباس نے تین جبکہ فہیم اشرف نے ایک وکٹ حاصل کی۔ ونڈیز کو جلد آؤٹ کرنے کے بعد پاکستان نے دوسری اننگز کا آغاز کیا اور 27.2 اوورز میں چھ وکٹوں کے نقصان پر 176 رنز پر اننگز ڈیکلیئر کر کے میزبان ٹیم کو جیت کے لیے 329 رنز کا ہدف دیا تھا۔
دوسرے ٹیسٹ میں مجموعی طور پر فاسٹ بالر شاہین شاہ آفریدی نے 10 وکٹیں حاصل کیں۔ انہیں میچ اور سیریز کا بہترین کھلاڑی کے ایوارڈ سے بھی نوازا گیا۔
