بھارت اور انگلینڈ کرکٹ ٹیمیں 18 فروری کو احمد آباد پہنچ چکی ہیں اور اگلے ہی دن سے تیسرے ٹیسٹ میچ کی تیاری کے لیے میدان پر پہنچ گئیں۔ تیسرا ٹیسٹ میچ 24 فروری سے شروع ہوگا۔
احمد آباد کا موٹیرا کرکٹ اسٹیڈیم دنیا کا سب سے بڑا کرکٹ اسٹیڈیم ہے جس میں بہ یک وقت ایک لاکھ 10 ہزار شائقین میچ کا لطف اٹھا سکتے ہیں اور اب اسی اسٹیڈیم میں پہلا انٹرنیشنل میچ بھارت اور انگلینڈ کے مابین کھیلا جائے گا جو اس سیریز کا تیسرا ٹیسٹ میچ ہے۔ یہ ٹیسٹ میچ ڈے نائٹ ہوگا اور اس کے لیے ٹکٹوں کی فروخت شروع ہوچکی ہے۔
تیسرے ٹیسٹ میچ کے لیے آف لائن ٹکٹوں کی فروخت شروع ہوگئی۔ ابھی تک میچ کے ٹکٹ نجی ویب سائٹ اور بی سی سی آئی کی ویب سائٹ پر آن لائن فروخت کیے جارہے تھے لیکن آج سے ٹکٹوں کی فروخت کا عمل آف لائن بھی شروع ہوگیا جس کے لیے شائقین کا ہجوم اور لمبی قطار دیکھی گئی۔
دنیا کے سب سے بڑے موٹیرا کرکٹ اسٹیڈیم (احمد آباد) میں میچ ہونے سے مقامی باشندے کافی خوش ہیں اور ٹکٹ خرید رہے ہیں۔ ایک لاکھ 10 ہزار شائقین کے بیٹھنے کی گنجائش ہونے کے باوجود کورونا وبا کے باعث 50 فیصد ٹکٹ ہی فروخت کی جائیں گی۔
یہ بھی پڑھیں: ارجن تیندولکر کی حمایت میں آئے فرحان اختر
دوسری جانب سواریوں کی پارکنگ کا مسئلہ سامنے آرہا ہے اور پارکنگ ٹکٹ کے لیے بھی لوگوں میں تشویش دیکھی گئی تاہم سکیورٹی گارڈ نے انہیں بتایا کہ پارکنگ ٹکٹ میچ کے دن ہی دستیاب ہوگا۔
اس اسٹیڈیم میں تقریباً 25 ہزار سواریوں کو پارک کرنے کی گنجائش ہے۔
اس میدان میں بھارت اور انگلینڈ کے مابین دو ٹیسٹ اور 5 ٹی 20 میچز کھیلے جائیں گے۔ 4 ٹیسٹ میچوں کی سیریز میں دونوں ٹیموں نے ایک ایک میچ جیتا ہے۔
