بی سی سی آئی نے ویسٹ انڈیز کے خلاف ہونے والی سیریز کا اعلان کرتے ہوئے بتایا کہ وراٹ کوہلی اور جسپریت بمراہ کو یک روزہ اور ٹی 20 سیریز میں آرام دیا جائے گا جبکہ ٹیسٹ میں یہ دونوں واپسی کریں گے۔
بھارتی کرکٹ کنٹرول بورڈ کی جانب سے جاری کردہ بیان کے مطابق کوہلی آسٹریلیا کے خلاف ہونے والی سیریز کے بعد سے مسلسل کھیل رہے ہیں، اسی لیے انہیں آرام کی سخت ضرورت ہے۔
اگر بھارت فائنل میں داخلہ حاصل کرتا ہے تو ظاہر ہے تمام کھلاڑی 14 جولائی تک کھیلیں گے جس کی وجہ سے مزید دیگر کھلاڑیوں کو آرام دیا جا سکتا ہے۔
بی سی سی آئی نے ویسٹ انڈیز کرکٹ بورڈ کے ساتھ مل کر ایسا منصوبہ بنایا ہے کہ ٹیسٹ سیریز سے قبل یک روزہ اور ٹی 20 سیریز ہو جائے اور ٹیسٹ شروع ہونے سے قبل ٹیم کے سرکردہ کھلاڑیوں کو آرام کرنے کے لیے زیادہ وقت مل سکے۔
ویسٹ انڈیز کے خلاف پہلا ٹیسٹ 22 اگست کو انٹیگا میں ہوگا جس کے لیے کھلاڑیوں کو آرام کے لیے کافی وقت ملے گا۔
اسی کے ساتھ اس بات کی بھی توقع ہے کہ کوہلی اور بمراہ 17 سے 19 اگست تک ویسٹ انڈیز کے خلاف سہ روزہ میچ میں شرکت کریں گے۔
