مشہور اداکار رشی کپور کا صبح ممبئی کے ایک اسپتال میں انتقال ہو گیا۔وہ 67 سال کے تھے۔رشی کینسر میں مبتلا تھے اور بدھ دیر رات ان کی طبیعت بگڑنے پر انہیں اسپتال میں داخل کرایا گیا تھا۔
رشی کپور کو بھارت رتن سچن تندولکر، ٹیم انڈیا کے کپتان وراٹ کوہلی، سابق بلے باز وریندر سہواگ، بیڈمنٹن اسٹار سائنا، پہلوان گیتا پھوگاٹ اور سابق کرکٹر محمد کیف نے خراج عقیدت پیش کیا۔
سچن تندولکر نے کہا کہ رشی جی کے انتقال کی خبر سے انتہائی پریشان ہوں۔ میں ان کی فلمیں دیکھ کر بڑا ہوا ہوں اور ہمیشہ ان سے مل کر بے حد اچھا لگتا تھا۔ خدا ان کی روح کو سکون دے۔نیتو جی، رنویر اور پورے کپور خاندان کے تئیں میری اظہار ہمدردی ۔
بھارتی کپتان وراٹ کوہلی نے کہا کہ اس خبر سے ساکت ہوں۔ واقعی یقین نہیں ہو رہا۔ کل عرفان اور آج رشی جی۔ان کے انتقال کی خبر کو قبول کرنا مشکل ہے۔ان کی روح کو سکون ملے۔
بھارتی کرکٹ ٹیم کے سابق اوپننگ بلے باز وریندر سہواگ نے کہا کہ رشی جی کے انتقال کی خبر سن کر کافی دکھی ہوں۔ان کے خاندان کے ساتھ اپنی تمام ہمدردی کا اظہار کرتا ہوں ۔
سائنا نہوال نے کہا کہ اس المناک خبر سے دن کی شروعات ہوئی۔خدا ان کی روح کو سکون دے۔ہم آپ کو بہت یاد کریں گے۔
پہلوان گیتا نے کہا کہ انتہائی المناک دور، کل خان صاحب آج رشی جی۔خدا ان عظیم شخصیات کی روح کو سکون فراہم کریں۔ اوم شانتی۔
کیف نے کہا کہ دن کا آغاز انتہائی دکھ کی خبر سے ہوا ۔ میرے پاس الفاظ نہیں ہیں. ان کی روح کو سکون ملے۔
