شاہد آفریدی ماضی میں بھی کشمیر پر بیانات دیکر بھارت کے میڈیا اور سابق کرکٹروں کی تنقید کا نشانہ بنے ہیں۔
پاکستان کے وزیر اعظم عمران خان نے آئندہ جمعہ کو اظہار یکجہتی کے لیے ’کشمیر آوور ‘کا اعلان کیا ہےجس کے بعد شاہد آفریدی نے ایک ٹویٹ کے ذریعے اس میں شرکت کی بات کی ہے۔
شاہد آفریدی نے اپنے ٹوئٹر پیغام میں کہا کہ' پاکستانی وزیراعظم کے کشمیر آور کے لئے جمعے کو دن 12 بجے مزارِ قائد جاؤں گا۔کراچی کے لوگ بھی میرے ساتھ کشمیری عوام سے اظہارِ یکجہتی کے لیے شرکت کریں۔'
آفریدی نے یہ بھی اعلان کیا کہ وہ 6 ستمبر کو لائن آف کنٹرول پر گولہ باری کے نتیجے میں مارے گئے ایک شخص کے گھر بھی جائیں گے۔
واضح رہے کہ گزشتہ روز انگلستان کے عالمی شہرت یافتہ پاکستانی نژاد باکسر عامر خان نے بھی کشمیریوں سے اظہار یکجہتی کرتے ہوئے ایل او سی کا دورہ کیا تھا۔
کشمیر میں نامساعد حالات پیدا ہونے کے بعد بھارت اور پاکستان کی سرکردہ شخصیات نے اپنے اپنے ممالک کی حکومتوں کے مؤقف کی تائید میں بیانات کا ایک لامتناہی سلسلہ شروع کیا ہے۔ بعض اوقات یہ شخصیات ان بیانات کے نتیجے میں ایک دوسرے کے ساتھ الجھ بھی رہے ہیں۔ عمومی طور یہ بیانات ٹوئٹر پر ہی جاری کئے جاتے ہیں۔
