ریاست اترپردیش کے ضلع سہارنپور کے گیان كلش انٹرنیشنل اسکول کے میدان میں بین الاقوامی سطح کی کرکٹ پچ کا افتتاحی پروگرام میں شامل ہونے آئےراجیو شکلا نے دھونی کی تعریف کی اور کہا کہ ان میں اب بھی ملک کو دینے کے لیے بہت کچھ ہے نیز وہ بھارت کے لیے کھیلتے رہیں گے۔
انہوں نے نامہ نگاروں سے بات کرتے ہوئے کہا کہ بھارتی کرکٹ ٹیم کے بہترین وکٹ کیپر مہندر سنگھ دھونی کے اندر ابھی بہت کرکٹ باقی ہے اور وہ قومی ٹیم کے لیے آگے بھی کھیلیں گے۔
راجیو شکلا نے کرکٹ ٹیم کے موجودہ کپتان وراٹ کوہلی اور سلامی بلے باز روہت شرما کے درمیان اختلافات کی مکمل طور پر تردید کی۔
سپریم کورٹ کے جسٹس ونیت شرن نے سہارنپور کے گیان كلش انٹرنیشنل اسکول کے میدان میں بین الاقوامی سطح کی کرکٹ پچ کا افتتاح کیا۔
جسٹس ونیت شرن نے کہا کہ کھیلوں کی دنیا میں بھارت کا غلبہ بڑھا ہے۔
انہوں نے کہا کہ ایک جانب جہاں بھارت نے بیڈمنٹن میں عالمی کھلاڑی پی وی سندھو، سائنا نہوال جیسے بہترین کھلاڑی دیے ہیں تو دوسری جانب کرکٹ نے وراٹ کوہلی، مہندر سنگھ دھونی، روہت شرما جیسے کھلاڑی دیے ہیں اور انہی کی وجہ سے ملک کے نوجوان کھیلوں میں دلچسپی لے رہے ہیں۔
اس موقع پر سابق مرکزی وزیر اور آئی پی ایل کے چیئرمین راجیو شکلا کے علاوہ اترپردیش کرکٹ ایسوسی ایشن کے سکریٹری يدھوير سنگھ، سہارنپور کے رکن اسمبلی اور گیان کلش انٹرنیشنل اسکول کے بانی سنجے گرگ، سہارنپور ڈسٹرکٹ کرکٹ ایسو سی ایشن کے ڈائریکٹر اکرم سیفی موجود تھے۔
