ممبئی اے ٹی ایس (انسداد دہشت گردی) نے ایک شخص کو گرفتار کیا ہے جس نے بی سی سی آئی کو دھمکی آمیز ای میل ارسال کیے تھے اور ای میل میں اس نے بھارتی کرکٹ کھلاڑیوں کو جان سے مارنے کی دھمکی دی تھی۔
پولیس نے اس معاملے پر سنجیدگی سے توجہ دیتے ہوئے باریک بینی سے چھان بین کی جب کہ یہ معاملہ اے ٹی ایس کے سپرد بھی کیا گیا تھا۔
تفتیش کے دوران اے ٹی ایس کو اطلاع ملی کہ دھمکی آمیز ای میل آسام سے بھیجا گیا تھا، جس کے بعد اے ٹی ایس کی ٹیم آسام روانہ ہوئی اور آسام پولیس کی مدد سے برج موہن داس نامی شخص کو گرفتار کیا۔
ملزم کر قبضے سے اے ٹی ایس نے ایک کمپیوٹر بھی بر آمد کیا ہے جس کی مدد سے اس نے بی سی سی آئی کو ای میل کیا تھا۔
تفصیلات کے مطابق ملزم آسام کے موری گاؤں کا رہنے والا ہے جس کے مدنظر پولیس نے اسے موری گاؤں کی مقامی عدالت میں پیش کر کے ٹرانزٹ ریمانڈ حاصل کیا اور ممبئی لے کر آئی۔
ملزم کو ممبئی اے ٹی ایس کی خصوصی عدالت میں پیش کیا گیا جہاں سے اسے 26 اگست تک کے لیے اے ٹی اس کی حراست میں بھیج دیا گیا۔
فی الحال اے ٹی ایس تفتیش کر رہی ہے کہ آخر اس طرح کے دھمکی آمیز ای میل بھیجنے کے پیچھے اس کا کیا مقصد تھا۔
