پونے میں مہاراشٹر کرکٹ اسوسی ایشن گراؤنڈ پر جنوبی افریقہ کے خلاف جاری دوسرے ٹیسٹ میچ کی پہلی اننگ میں روی چندرن اشون چار وکٹ حاصل کرکے بھارتی گیند بازوں کی خصوصی فہرست میں شامل ہو گئے ہیں۔
دوسرے ٹیسٹ میچ میں چار وکٹیں حاصل کر کے روی چندرن اشون جنوبی افریقہ کے خلاف 50 وکٹیں حاصل کرنے والے بھارت کے چوتھے گیند باز بن گئے ہیں۔
اشون نے اس میچ میں جنوبی افریقہ کے کپتان فاف ڈو پلیسس، وکٹ کیپر کوئنٹن ڈی کاک، کیشو مہاراج اور کگیسو رباڈا کو پویلین کی راہ دکھائی، ان کی بہترین گیند بازی کی بدولت جنوبی افریقہ 275 رنز پر آؤٹ ہوگئی اور بھارت کو 326 رنز کی بڑی برتری حاصل ہوگئی ہے۔
جنوبی افریقہ کے خلاف 50 ٹیسٹ وکٹ لینے والے بھارتی گیند بازوں کی فہرست میں عظیم اسپنر انیل کمبلے، سابق تیز گیند باز جواگل سری ناتھ اور سابق آف اسپنر ہربھجن سنگھ کا نام شامل ہے۔
انیل کمبلے نے جنوبی افریقہ کے خلاف 84 ٹیسٹ وکٹیں جبکہ جواگل سری ناتھ اور ہربھجن سنگھ نے بالترتیب 64 اور 60 وکٹیں حاصل کی ہیں۔
