بھارت کو ورلڈ کپ فاتح بنانے والے سابق کپتان کپل دیو کو جمعرات کو دل کا دورہ پڑنے کے بعد جنوبی دہلی کے فورٹس اسکارٹس ہاسپٹل میں داخل کرایا گیا تھا جہاں ان کی کامیاب ایمرجنسی کورونری انجیو پلاسٹی سرجری ہوئی۔
بھارت کے سابق کرکٹر چیتن شرما نے ٹویٹ کرکے جانکاری دی کہ گزشتہ روز کپل دیو کی طبیعت بگڑنے کے بعد انہیں ہسپتال لے جایا گیا تھا جہاں ان کی کامیاب انجیو پلاسٹی سرجری کے بعد آج انہیں ہسپتال سے ڈسچارج کردیا گیا۔
ہسپتال کی جانب سے جاری کردہ بیان میں کہا گیا کہ 'کپل دیو کو آج دوپہر کو ہسپتال سے چھٹی دے دی گئی ہے۔ وہ تیزی سے صحتیاب ہورہے ہیں اور بہت جلد اپنا روز مرہ کا کام شروع کرسکتے ہیں اور باقاعدگی سے ڈاکٹر اتُل ماتُھر سے صلاح و مشورہ کرتے رہیں گے۔
فورٹس اسکارٹس ہسپتال میں شعبہ امراض قلب کے ڈائریکٹر ڈاکٹر اتُل ماتُھر کے مطابق کپل کو جمعرات کی دوپہر ایک بجے ہسپتال میں بھرتی کرایا گیا تھا جہاں ان کی ایمرجنسی کورونری انجیو پلاسٹی کی گئی۔
ہسپتال نے اپنے بیان میں مزید کہا کہ 'بھارتی کرکٹ ٹیم کے سابق کپتان کپل دیو کو سینے میں درد کی شکایت کے بعد جمعرات کی دوپہر ایک بجے دہلی کے اوکھلا کے فورٹس ہسپتال میں داخل کرایا گیا تھا بعد میں ڈاکٹر اتُل ماتُھر کی نگرانی میں ایمرجنسی انجیو پلاسٹی کی گئی۔
کپل دیو کی کپتانی میں بھارتی کرکٹ ٹیم نے سنہ 1983 میں پہلی بار یک روزہ ورلڈ کپ جیتا تھا۔ کپل نے بھارت کی جانب سے 131 ٹیسٹ اور 225 یک روزہ میچ کھیلے ہیں جس میں انہوں نے بالترتیب 5248 اور 3783 رنز بنائے ہیں۔ اس کے علاوہ وہ 275 فرسٹ کلاس میچ اور 310 لسٹ اے میچ بھی کھیل چکے ہیں۔
کپل دیو نے اپنے ٹیسٹ کیریئر کا آغاز 16 اکتوبر سنہ 1978 کو فیصل آباد میں پاکستان کے خلاف کیا تھا جبکہ اکتوبر 1978 میں کوئٹہ میں پاکستان کے خلاف یک روزہ کریئر کی شروعات کی تھی۔
کپل دیو نے اپنا آخری ٹیسٹ مارچ 1994 میں ہیملٹن میں نیوزی لینڈ کے خلاف جبکہ آخری ون ڈے اکتوبر 1978 میں فرید آباد میں ویسٹ انڈیز کے خلاف تھا۔
