آئی پی ایل کے لیگ میچز اب ختم ہو چکے ہیں، آخری میچ کولکاتا نائٹ رائیڈرس اور ممبئی انڈینز کے درمیان کھیلا گیا جس میں کولکاتا ہار کر اس ٹورنامنٹ سے باہر ہو گئی ہے۔
ممبئی انڈینز پہلے ہی پلے آف کے لیے کوالیفائی کر چکی تھی لیکن گزشتہ شب ہونے والے میچ میں جیت کے بعد وہ پوائنٹس ٹیبل میں سرفہرست مقام پر پہنچ گئی ہے۔
ممبئی کی 14 میچوں میں یہ 9 ویں جیت تھی اور اب اس کے 18 پوائنٹس ہو گئے ہیں۔
حالاںکہ چینئی سپر کنگز کے بھی 14 میچوں میں 18 پوائنٹس ہیں لیکن بہتر رن ریٹ کی بنیاد پر ممبئی سرفہرست مقام پر ہے۔
پلے آف کے لیے کولکاتا کو اپنا آخری میچ ہر حال میں جیتنا تھا لیکن اس معرکے کو سر کرنے میں ناکام ثابت ہوئی اور ٹورنامنٹ سے باہر ہو گئی ہے۔
کولکاتا کے ہارنے کے بعد سنرائیزرس حیدرآباد پلے آف میں پہنچنے والی چوتھی ٹیم بن گئی ہے۔
حیدرآباد سے پہلے چینئی سپر کنگز، دہلی كیپٹلز اور ممبئی انڈینز پہلے ہی پلے آف کے لیے کوالیفائی کر چکی تھیں جبکہ کولکاتا کی 14 میچوں میں یہ آٹھویں شکست تھی اور وہ 12 پوائنٹس کے ساتھ پوائنٹ ٹیبل میں پانچویں نمبر پر تھی جبکہ حیدرآباد کے بھی 14 میچوں میں سے 12 ہی پوائنٹس ہیں لیکن بہتر رن ریٹ کی بنیاد پر حیدرآباد پلے آف میں پہنچنے میں کامیاب رہا۔
