پاکستان کے خلاف ہونے والے دوسرے ٹیسٹ میچ میں چار وکٹیں لینے والے اسٹورٹ براڈ ایک پائیدان کی بہتری کے ساتھ دوسرے نمبر کے گیند باز بن گئے ہیں جبکہ ان ساتھی گیند باز جیمس اینڈرسن نے بھی پاکستان کے خلاف ٹیسٹ میچ میں تین وکٹیں لی تھیں جس کے بعد وہ دو مقامات کے فائدے کے ساتھ 14 ویں نمبر پر پہنچ گئے ہیں۔
اس کے علاوہ پاکستانی گیند بازوں کی بات کریں تو محمد عباس کو بھی دو مقام کا فائدہ ہوا ہے اور وہ اب 8 ویں نمبر ہیں جبکہ بھارت کے یارکر مین جسپریپ بمراہ ایک مقام کے نقصان کے ساتھ 9 ویں نمبر پر چلے گئے ہیں۔
اگر بلے بازوں کی درجہ بندی پر نظر ڈالیں تو پاکستان کے بابر اعظم اپنے کریئر کے بہترین 5 ویں نمبر پر پہنچ گئے ہیں، بابر اس سے قبل فروری میں بھی اسی نمبر پر پہنچے تھے۔ جبکہ ان کے ہم وطن کھلاڑی عابد علی 49 ویں اور محمد رضوان 75 ویں نمبر پہنچ گئے ہیں۔
اس کے علاوہ آئی سی سی کی ٹیسٹ چیمپیئن شپ درجہ بندی کی بات کریں اور اس میں انگلینڈ 279 پوائنٹس کے ساتھ تیسرے جبکہ پاکستان 153 پوائنٹس کے ساتھ پانچویں نمبر پر ہے۔
ٹیسٹ چیمپیئن شپ میں 360 پوائنٹس کے ساتھ بھارت پہلے اور 296 پوائنٹس کے ساتھ آسٹریلیا دوسرے نمبر پر برقرار ہے۔
