آئی سی سی نے حال ہی میں ہر ماہ بہترین کارکردگی کا مظاہرہ کرنے والے مرد اور خواتین کھلاڑیوں کو 'پلیئر آف دی منتھ' کا ایوارڈ دینے کا اعلان کیا تھا جس کے لیے آئی سی سی نے تین مرد کھلاڑیوں کو نامزد کیا۔
بھارت کے 23 سالہ جارحانہ بلے باز رشبھ پنت نے حال ہی میں اختتام پذیر سیریز میں آسٹریلیا کے خلاف دو ٹیسٹ میچ کھیلے تھے۔ انہوں نے سڈنی ٹیسٹ میں 97 اور چوتھے اور آخری ٹیسٹ میں ناٹ آوٹ 89 رنز بنائے تھے جس کی بدولت ٹیم کو آسٹریلیا کے خلاف تاریخی جیت میں مدد ملی تھی۔
انگلینڈ کے کپتان جو روٹ نے سری لنکا کے خلاف حالیہ دو ٹیسٹ میچوں کی سیریز میں عمدہ کارکردگی کا مظاہرہ کیا تھا اور 228 اور 186 ر ن کی شاندار اننگز کھیلی تھی۔ ان کی اس اننگز کی بدولت انگلینڈ نے سری لنکا کو 0-2 سے شکست دے کر کلین سویپ کیا تھا۔
اس ایوارڈ کے لیے نامزد تیسرے کھلاڑی آئر لینڈ کے پال اسٹرلنگ نے متحدہ عرب امارات (یواے ای ) کے خلاف دو یک روزہ اور افغانستان کے خلاف تین یک روزہ میچ کھیلے جس میں انہوں نے تین سنچریاں بنائیں۔
یہ بھی پڑھیں: آسٹریلیا کا جنوبی افریقہ دورہ ملتوی
دریں اثنا خواتین کے زمرے میں پاکستان کی ڈیانا بیگ، جنوبی افریقہ کی شبنم اسماعیل اور ماریجین کاپ کو 'وومن پلیئر آف دی منتھ' کے لیے نامزد کیا گیا ہے۔
مرد اور خواتین پلیئر آف دی منتھ کے فاتحین کا اعلان مہینے کے دوسرے پیر کے روز آئی سی سی کے ڈیجیٹل چینلز پر کیا جائے گا۔
