حیدرآباد کرکٹ ایسوسی ایشن کے صدر اور سابق بھارتی کپتان محمد اظہرالدین نے کہاکہ کوروناوائرس کے سبب بین الاقوامی کرکٹ کلینڈر کو ایک بار پھر سے تیار کرنے کی ضرورت ہے کیونکہ غیریقینی صورتحال کے سبب آ ئی سی سی کے تمام فیوچرٹور پروگرام ملتوی کردئے گئے ہیں۔
انہوں نے کہاکہ حالات کے مدنظرگزشتہ فیوچرٹورپروگرام کوملتوی کرکے نئے کرکٹ کلینڈر بنانے کی ضرورت ہے تاکہ تمام سیریز اور ٹورنامنٹ شیڈول کے مطابق کھیلاجاسکے۔
سابق کپتان نے کہاکہ کوروناوائرس کے سبب تمام کرکٹ مقابلوں کو ملتوی کردیا گیا ہے۔ فیوچر ٹورپروگرام میں بھی تبدیلی لازمی ہے۔ اگر اس میں تبدیلی نہیں کی گئی تو انڈین پریمیئر لیگ کا انعقاد خطرے میں پڑ سکتا ہے ۔
ایچ سی ایل کے صدرکا کہنا ہے کہ انڈین پریمیئر لیگ کرکٹ کلینڈر کے لئے اہم ٹورنامنٹ ہے۔ مقامی اوربین الاقوامی کرکٹرز کے لئے بے صبری سے انتظار کرتے ہیں۔ اس کی اہمیت کو دیکھتے ہوئے آئی پی ایل کے لئے فیوچر ٹورپروگرام میں تبدیلی ضروری ہے ۔
محمداظہرالدین کے مطابق آئی پی ایل نہ ہونے کی صورت میں نہ صرف فرانچائزی کوبلکہ حیدرآباد کرکٹ ایسوسی ایشن سمیت تمام اداروں کو بھاری مالی نقصان کاسامنا کرناپڑسکتا ہے۔
واضح رہے کہ محمد اظہرالدین بھارت کی جانب سے 99 ٹیسٹ میچ اور 334 ون ڈے انٹرنیشنل میچ کھیل چکے ہیں۔
