انڈین پریمیئر لیگ کی ٹیم ممبئی انڈیئنز کو بی سی سی آئی منتظمین کی کمیٹی نے امریکہ میں آئی پی ایل کی تشہیر کرنے سے انکار کر دیا ہے، جبکہ اس معاملے میں ممبئی انڈیئنز کی جانب سے جاری بیان کے مطابق ان کا مقصد صرف کھیل کو فروغ دینے کا تھا اور فرنچائیزی اس تعلق سے کافی سنجیدہ تھی۔
تفصیلات کے مطابق ممبئی انڈیئنز یہ چاہتی تھی کہ جس طرح فٹ بال کلب، سیزن کے آغاز سے پہلے ایشیائی ممالک کا پری سیزن دورہ کرتے ہیں اور کھیل کی تشہیر کرتے ہیں اور شائقین کی تعداد میں اضافہ کرتے ہیں، اسی طرح ممبئی انڈیئنز بھی امریکہ میں برانڈ آئی پی ایل کی تشہیر کی حکمت عملی بنا رہی تھی۔
بی سی سی آئی کی جانب سے جاری بیان کے مطابق اس طرح کے پروگرام کے لیے بورڈ کی منظوری کی ضرورت ہوتی ہے کیونکہ ممبئی انڈیئنز بی سی سی آئی سدے منظور شدہ ٹورنامنٹ میں حصہ لیتی ہے۔
واضح رہے کہ ممبئی انڈیئنز کی کوشش امریکہ میں آئی پی ایل کو فروغ دینے کے ساتھ کھیل کے لیے نئی مارکیٹ تیار کرنے کی تھی، اگر منظوری مل جاتی تو ٹیم وہاں جاتے اور مقامی ٹیموں کے ساتھ کچھ میچز کھیلتی جس کی وجہ سے اس ملک میں کرکٹ سے محبت کرنے والے لوگ اپنی طرف متوجہ ہوتے اور انہیں اپنے پسندیدہ کھلاڑیوں سے ملنے کا موقع بھی ملتا۔
