چوتھے دن کے کھیل کے ہیرو بھی اسٹیو اسمتھ رہے اور انہوں نے میچ میں اپنی دوسری سنچری بنائی۔
آسٹریلیا نے اسٹیو اسمتھ کی شاندار بلے بازی کی بدولت 7 وکٹوں کے نقصان پر 487 رنز پر اپنی اننگ کے خاتمے کا اعلان کیا اور انگلینڈ کے سامنے 398 رنز کا ہدف دیا۔
آسٹریلیا نے پہلی اننگ میں 284 رنز بنائے تھے جس میں اسٹیو اسمتھ نے 144 رنز کی شاندار اننگ کھیلی تھی جبکہ انگلینڈ کی جانب سے اسٹورٹ براڈ نے 5 وکٹیں حاصل کی تھیں۔
آسٹریلیا کے 284 رنز کے جواب میں انگلینڈ نے بہتر بلے بازی کا مظاہرہ کیا تھا لیکن اچانک اس کی بلے بازی لڑکھڑائی اور پوری ٹیم 374 رنز پر آؤٹ ہوگئی تھی اور آسٹریلیا پر 90 رنز کی برتری حاصل کی، انگلینڈ کی جانب سے روری برنس نے سب سے زیادہ 133 رنز بنائے تھے جبکہ پیٹ کمنز 3 بلے بازوں کو پویلین بھیج کر سب سے کامیاب گیندبازی بنے تھے۔
آسٹریلیا کی دوسری اننگ بھی ٹھیک نہیں رہی اور اس کے دونوں سلامی بلے بازوں نے ایک بار پھر سے مایوس کیا اور 27 رنز کے مجموعی اسکور پر دونوں آؤٹ ہوگئے تھے اس کے بعد اسٹیو اسمتھ نے ایک مرتبہ پھر ٹیم کو بحران سے نکالا اور میچ میں اپنی دوسری سنچری بنائی۔
اسمتھ نے پہلی اننگ میں 144 اور دوسری اننگ میں 142 رنز بنائے جبکہ میتھیو ویڈ نے بھی ان کا بخوبی ساتھ دیا اور اپنی پہلی سنچری مکمل کی، انہوں نے 110 رنز بنائے۔
آسٹریلائی کپتان نے 487 رنز کے مجموعی اسکور پر اننگ کا اختتام کرنے کا فیصلہ کیا اور میزبان کو 398 رنز کا ہدف دیا۔
دوسری اننگ میں انگلینڈ کے گیند باز وکٹ کے لیے جدوجہد کرتے نظر آئے جس میں بین اسٹوکس نے 3 اور معین علی نے 2 بلے بازوں کو پویلین کی راہ دکھائی۔
میزبان انگلینڈ نے 398 رنز کے ہدف کا تعاقب کرتے ہوئے چوتھے دن کا کھیل ختم ہونے تک بنا کسی نقصان کے 13 رنز بنا لئے ہیں اور آخری دن اسے میچ جیتنے کے لیے مزید 385 رنز بنانے ہیں۔
