لاہور: بابر اعظم کو بطور کپتان اور بلے باز پاکستان کرکٹ میں شاندار کارکردگی پر باوقار سول ایوارڈ سے نوازا گیا ہے۔ سال 2015 میں اپنے کیریئر کا آغاز کرنے والے بابر اعظم ٹیم کی بیٹنگ کا بوجھ اٹھاتے ہوئے یک کے بعد کئی ریکارڈ توڑنے میں کامیاب رہے۔ اب 28 سالہ کھلاڑی کو ان کی شاندار کامیابیوں پر ستارہ امتیاز ایوارڈ سے نوازا گیا ہے۔ بابر اعظم یہ اعزاز حاصل کرنے والے ملک کے سب سے کم عمر کرکٹر ہیں۔
ستارہ امتیاز ملنے کے بعد بابر اعظم نے اپنے والدین کے ساتھ تصویر شیئر کی، ساتھ ہی انہوں نے لکھا 'اپنی والدہ اور والد کی موجودگی میں ستارہ امتیاز حاصل کرنا بہت بڑا اعزاز ہے۔ انہوں نے لکھا کہ یہ ایوارڈ ان کے والدین کے لیے، مداحوں اور پاکستان کے لوگوں کے لیے ہے۔ بابر اعظم کوگورنر ہاؤس لاہور میں یوم پاکستان کے موقع پر ہونے والی تقریب میں ستارہ امتیاز سے نوازا گیا۔ گورنر پنجاب بلیغ الرحمان نے بابر اعظم کو ستارہ امتیاز کا میڈل پہنایا۔
