پاکستان کرکٹ ٹیم کے کپتان بابر اعظم نیشنل ٹی 20 میں ناردرن کے خلاف سینٹرل پنجاب کی جانب سے سنچری بناکر اس فارمیٹ میں سب سے زیادہ سنچری بنانے والے پاکستانی کھلاڑی بن گئے ہیں۔
راولپنڈی میں کھیلے جارہے نیشنل ٹی 20 ٹورنامنٹ میں سینٹرل پنجاب کی جانب سے بابر اعظم نے 63 گیندوں پر 105 رنز کی شاندار ناٹ آوٹ اننگز کھیلی۔
یہ بابر اعظم کے ٹی 20 کیریئر کی چھٹی سنچری تھی جس کے ساتھ وہ ٹی 20 میچوں میں سب سے زیادہ سنچری بنانے والے پاکستان کے کھلاڑی بن گئے ہیں۔
بابر اعظم نے 185 اننگز میں 6 سنچریاں اسکور کی ہیں، اس کے بعد پاکستان کے احمد شہزاد اور کامران اکمل نے پانچ، پانچ، خرم منظور نے چار، مختار احمد اور شرجیل خان نے تین تین سنچریاں مکمل کی ہیں۔
بابر اعظم چھ یا اس سے زائد سنچریاں بنانے والے دنیا کے نویں بلے باز ہیں جبکہ اس فہرست میں کرس گیل 22 سنچریوں کے ساتھ سرفہرست ہیں۔
