پاکستان کے نیشنل کمانڈ اینڈ آپریشن سینٹر (این سی او سی) نے پاکستان اور نیوزی لینڈ کے درمیان آئندہ سیریز کے دوران میدان پر 25 فیصد شائقین کی موجودگی کی منظوری دے دی ہے۔
این سی او سی کے اس اعلان کے مطابق تقریبا 4500 شائقین کو ون ڈے میچ دیکھنے کی اجازت دی جائے گی، جبکہ ٹی ٹوئنٹی سیریز کے لیے تقریبا 5500 کو میدان میں بیٹھنے کی اجازت دی جا سکتی ہے، حالانکہ میدان میں صرف انہیں لوگوں کو داخلہ دیا جائے گا جنہیں کورونا ویکسین کے دونوں ڈوز لگے ہوں گے اور ان کے پاس کورونا ویکسینیشن کا سرٹیفکیٹ ہوگا۔
پاکستان کرکٹ بورڈ (پی سی بی) کے چیف ایگزیکٹو وسیم خان نے پیر کے روز ایک بیان میں کہا، 'شائقین کسی بھی کھیل کے ایونٹ کا جوہر ہوتے ہیں، کیونکہ وہ کھلاڑیوں کے لیے بہترین کارکردگی، پرفارمنس اور خوشگوار ماحول پیدا کرتے ہیں۔ ہم پی سی بی کو آٹھ میچوں کے لئے 25 فیصد شائقین کو بلانے کی اجازت دینے کے لئے این سی او سی کے شکر گزار ہیں۔'
انہوں نے کہا کہ 'مجھے یقین ہے کہ این سی او سی کے فیصلے کے بعد بغیر ویکسینیشن والے کرکٹ فالوور اپنے ویکسینیشن عمل میں تیزی لائیں گے، تاکہ وہ 2003 کے بعد سے دونوں ٹیموں کے درمیان گھریلو میدان پر پہلی سیریز دیکھ سکیں۔'
یہ بھی پڑھیں: جو روٹ انگلینڈ کے سب سے کامیاب کپتان بن گئے
انہوں نے مزید کہا کہ 'یہ شائقین کے لیے نہ صرف سیزن۔ اوپننگ سیریز میں کچھ معیاری کرکٹ کا لطف لینے کا موقع ہوگا، بلکہ دونوں ٹیموں کے کھلاڑیوں کی حمایت بھی کرے گا، کیونکہ دونوں ٹیموں کے درمیان ہونے والے ایک روزہ میچ آئی سی سی مینز ورلڈ کپ 2023 کوالیفکیشن کا حصہ ہیں۔'
قابل ذکر ہے کہ نیوزی لینڈ دورہ پاکستان پر تین ون ڈے کھیلے گا، جو بالترتیب 17، 19 اور 21 ستمبر کو راولپنڈی کرکٹ اسٹیڈیم میں کھیلا جائے گا۔ اس کے بعد پانچ میچوں کی ٹی ٹونٹی سیریز ہوگی، جو 25 ستمبر سے 3 اکتوبر تک لاہور کے قذافی اسٹیڈیم میں منعقد ہوگی۔
(یو این آئی)
