ریاست مدھیہ پردیش کے شہر اندور میں کورونا سے متاثر مریضوں کی تعداد میں مسلسل اضافہ ہورہا ہے، گذشتہ 24 گھنٹوں میں 900 سے زیادہ کورونا کے نئے مریضوں کی تصدیق کی گئی ہے۔
کورونا کے مریضوں میں اضافے سے جہاں اسپتالوں میں بیڈ ختم ہورہے ہیں۔ وہیں اسپتالوں میں آکسیجن کی بھی کافی زیادہ قلت ہو رہی ہے، اندور کے اسپتالوں میں آکسیجن کی قلت کو کچھ حد تک پوری کرنے کے لیے اداکار سونو سود نے دس آکسیجن سلنڈر عطیہ کیا ہے تاکہ کورونا سے متاثر مریضوں کا علاج بآسانی ہو سکے۔
فلم اداکار سونو سود نے سوشل میڈیا کے ذریعے ایک ویڈیو پیغام میں کہا کہ اندور کے لوگ اپنا خاص خیال رکھیں اور مجھے جب معلوم ہوا کہ اندور میں آکسیجن کی کافی زیادہ قلت ہو رہی ہے تو میں نے آج دس آکسیجن کے جنریٹر اندور بھیج رہا ہوں تاکہ آپ کی مشکلیں کچھ حد تک کم ہو سکیں۔
سونو سود نے مزید کہا کہ میں تمام لوگوں سے گزارش کرتا ہوں کہ ہم سب متحد ہو کر ایک دوسرے کی مدد کریں تاکہ اس وبا سے جلد سے جلد ہم باہر نکل سکیں۔
واضح رہے کہ گزشتہ برس بھی اداکار سونو سود نے وبا کے دوران ضرورت مندوں اور غیر ریاستی مزدوروں کو اپنے اپنے آبائی وطن لوٹنے میں کافی مدد کی تھی۔
