بالی ووڈ کے مشہور اداکار امیتابھ بچن اور ابھیشیک بچن میں کورونا مثبت کی تصدیق ہونے کے بعد اسپتال میں داخل کرایا گیا تھا۔ جس کے بعد دونوں ہی زیر علاج ہیں۔
77 سال کے امیتابھ اور 44 سال کے ابھیشیک نے 11 جولائی کو ٹوئیٹر پر کورونا مثبت کی تصدیق کرتے ہوئے بتایا تھا کہ وہ دونوں ہی ناناوتی اسپتال کے آئسولیشن وارڈ میں ہیں۔
اسپتال کے ذرائع کے مطابق دونوں کی حالت مستحکم ہے اور دونوں ہی پر علاج کا اثر نظر آرہا ہے۔وہ کم از کم سات دنوں تک ڈاکٹروں کی نگرانی میں ہی رہیں گے۔
ان دونوں کے علاوہ امیتابھ کی بہو اور اداکارہ ایشوریہ بچن اور انکی 8 سالہ پوتی آرادھیا بچن بھی کورونا متاثر پائی گئی ہیں۔
ابھیشیک نے اتوار کے روز ٹوئیٹر ٹوئیٹ کرتے ہوئے اس بات کی تصدیق کی کہ ایشوریہ اور آرادھیا بھی کورونا متاثر ہیں اور انہوں نے گھر میں ہی خود ساختہ علیحدگی اختیار کی ہوئی ہے۔
بچن خاندان کے چار لوگوں کے کورونا متاثر پائے جانے کے بعد ان کے بنگلو میں کام کرنے والے 26 عملے کی بھی کورونا جانچ کی گئی ہے۔جس کے بعد پیر کے روز اسسٹنٹ میونسپل کمیشنر نے کہا کہ تمام اسٹاف ممبر کی کورونا جانچ کی رپورٹ منفی آئی ہے۔
