مراٹھی فلم انڈسٹری سے ایک افسوسناک خبر آئی جس کے مطابق اداکارہ ایشوری دیشپانڈے کی گوا میں ایک کار حادثے میں موت ہوگئی۔
ذرائع سے ملی اطلاعات کے مطابق یہ حادثہ صبح تقریباً 5 بجے گوا کے بردیز تعلقہ کے قریب ارپورہ علاقے میں پیش آیا۔
ایشوری دیش پانڈے کے ساتھ اس کا دوست شُبھم ڈیگڑے بھی گاڑی میں موجود تھا اور اس نے بھی موقع پر ہی دم توڑ دیا۔
رپورٹس کے مطابق ایشوری دیشپانڈے کی گاڑی باگا کریک کے گہرے پانی میں ڈوب گئی۔ پولیس نے ان دونوں کی لاشیں گہرے پانی میں ڈوبی ہوئی کار سے نکالیں۔
بتایا جا رہا ہے کہ جس گاڑی میں ایشوری دیشپانڈے اور شُبھم جا رہے تھے اس کی رفتار بہت زیادہ تھی۔ تاہم ابھی تک یہ معلوم نہیں ہوسکا کہ گاڑی کون چلا رہا ہے۔
ایشوری دیشپانڈے اور شُبھم اگلے ماہ منگنی کرنے کا ارادہ کر رہے تھے۔ دونوں 15 ستمبر کو گوا آئے تھے۔ دونوں نے کچھ دن پہلے اپنے مراٹھی اور ہندی پروجیکٹس کی شوٹنگ مکمل کی تھی۔
