اس واقعہ سے شہر کے پنجہ گٹہ علاقہ میں کچھ دیر کے لئے سنسنی پھیل گئی۔
اس بس میں سوار مسافرین نے بتایاکہ جمعرات کی صبح براہ پنجہ گٹہ سرکل، پنجہ گٹہ جانے والی بس میں ایک چینل کا کیمرہ مین سفر کر رہا تھا۔اس کیمرہ مین نے بس میں سوار ایک اور مسافر سے بازو ہٹنے کی خواہش کی جس پر اس مسافر نے برہمی کا اظہار کرتے ہوئے اپنی جیب سے ریوالور نکالی اور گولی چلادی۔
یہ گولی بس کی چھت پر پیوست ہوگئی۔اس واقعہ کے ساتھ ہی بس میں بیٹھے مسافرین میں ہلچل مچ گئی تاہم اس واقعہ میں کوئی بھی زخمی نہیں ہوا۔واقعہ کے فوری بعد گولی چلانے والے مسافر نے بس کو چھوڑدیا اور دوسری بس میں سوار ہوگیا۔
اس واقعہ کے سلسلہ میں پنجہ گٹہ انسپکٹر پولیس موہن کمار نے کہاکہ اس تعلق سے ان سے کوئی شکایت نہیں کی گئی ہے۔گولی چلانے والے شخص کی شناخت نہیں ہوپائی ہے۔گولی چلانے والا سفاری سوٹ میں ملبوس تھا۔اس واقعہ کے بعد بس کو نہیں روکا گیا۔
