اطلاعات کے مطابق پولیس نے ایک گروہ کو پکڑنے کے لیے اکشردھام مندر کے قریب جال بچھایا تھا۔ اسی دوران بدمعاشوں نے پولیس کو دیکھتے ہی فائرنگ کردی۔ جوابی کارروائی کرتے ہوئے پولیس نے بھی گولیاں چلائیں لیکن کار سوار بدمعاش فرار ہونے میں کامیاب ہوگئے۔
پولیس کو اطلاع ملی تھی کہ اکشردھام میٹرو اسٹیشن کے پاس ایک گروہ لوگوں کو سواری کے بہانے کار میں بٹھاتا ہے اور پھر ان کو لوٹ لیتا ہے۔
پولیس نے گروہ کو پکڑنے کے لیے اکشردھام میٹرو اسٹیشن کے اطراف میں ٹریپ لگایا تھا۔ اس دوران تقریبا 10:45 بجے پولیس کی نظر ایک سفید رنگ کی کار پر گئی جس میں سواریوں کو سوار کیا جارہا تھا۔
پولیس افسر نے جب کار میں بیٹھے سوار لوگوں سے پوچھ گچھ کرنی چاہی، تو بدمعاش پولیس ٹیم پر فائرنگ کر کے بھاگنے لگے۔
جوابی کارروائی میں پولیس نے بدمعاشوں کا پیچھا کرتے ہوئے فائرنگ کی لیکن کار سوار فرار ہونے میں کامیاب رہے۔
فی الحال پولیس نے فرار بدمعاشوں کی تلاش شروع کردی ہے۔ آس پاس میں لگے سی سی ٹی وی فوٹیج سے بدمعاشوں کی پہچان کی کوشش کی جارہی ہے۔
