اطلاعات کے مطابق سہارنپور پولیس نے ایک شخص کو چوری کے زیورات سمیت گرفتار کرنے میں کامیابی حاصل کی۔ پولیس نے اسیم نام کے چور سے 25 تولہ سونے چاندی کے زیورات بھی برآمد کیے ہیں۔
تھانہ کوتوالی شہر سہارنپور پولیس نے اسیم کو پنجاب نیشنل بینک کے سامنے سے گرفتار کیا ہے۔
ایس پی سٹی ونت بھٹناگر نے واردات کا انکشاف کرتے ہوئے بتایا کہ گزشتہ 29 تاریخ کو تسلیم نامی ایک شخص نے مقدمہ درج کرایا تھا کہ اس کے گھر میں دو بیٹیوں کی شادی ہوئی تھی، گھر میں کچھ مسائل چل رہے تھے، کسی نے انہیں بتایا کہ جھاڑ پھونک کرانے سے حالات بہتر ہوجائیں گے۔ انہوں نے اس تعلق سے اسیم نامی شخص سے ملاقات کروائی تھی جو یادگار مسجد میں قیام پذیر تھا۔
تسلیم نے اسیم کو بلایا اور اس سے سارے زیورات اپنے پاس منگوائے۔ بعد میں اسیم پورے زیورات لے کر فرار ہوگیا تھا۔ ایس پی سٹی نے بتایا کہ یہ سبھی زیورات 25 تولے سونے چاندی کے تھے اور جس کی قیمت 10 لاکھ روپے بتائی جارہی ہے، گرفتار شخص نیپال کا رہنے والا بتایا جا رہا ہے۔ ایس پی سٹی نے اسیم کے خلاف مقدمہ قائم کر لیا ہے اور آگے کی کارروائی عمل میں لائی جارہی ہے۔
