واشنگٹن: امریکہ نے منکی پوکس کے معاملات میں مسلسل اضافے کے پیش نظر ملک میں صحت عامہ کی ایمرجنسی کا اعلان کیا ہے۔ امریکہ میں منکی پوکس انفیکشن کے اب تک 6,600 کیسز رجسٹر کیے جا چکے ہیں۔ امریکی حکومت کے اس فیصلے سے منکی پوکس انفیکشن کے پھیلاؤ کو روکنے کے لیے ویکسین، علاج اور وسائل کی فراہمی میں تیزی آنے کی توقع ہے۔Monkeypox in US
وائٹ ہاؤس نے اس ہفتے کے شروع میں قومی رابطہ اور نگرانی کے لیے ایک ٹیم کی تقرری کا بھی اعلان کیا ہے۔ اس ٹیم میں نیویارک کے ایک معالج ڈیمیٹر ڈسکالاکس بھی شامل ہیں جنہوں نے امریکہ میں ایچ آئی وی کے پھیلاؤ کو روکنے کے لیے ایک کامیاب اقدام کی قیادت کی ہے۔ امریکن سینٹرز فار ڈیزیز کنٹرول اینڈ پریوینشن (سی ڈی سی) کے اعداد و شمار کے مطابق، اس سال دنیا بھر میں منکی پوکس انفیکشن کے 26000 سے زیادہ کیسز کی تصدیق ہوئی ہے۔
یہ بھی پڑھیں: WHO on Monkeypox: منکی پوکس عالمی ایمرجنسی، ڈبلیو ایچ او
واضح رہے کہ 23 جولائی کو دنیا بھر میں منکی پوکس Monkeypox کے بڑھتے ہوئے کیسز کے پیش نظر ڈبلیو ایچ او نے عالمی صحت ایمرجنسی کا اعلان کر دیا تھا۔ عالمی ہنگامی صورتحال کا اعلان کرنے کا مطلب ہے کہ منکی پوکس کی وبا ایک غیر معمولی وبا ہے جو مزید ممالک میں پھیل سکتی ہے اور اس کے لیے مربوط عالمی ردعمل کی ضرورت ہے۔ ڈبلیو ایچ او نے اس سے قبل صحت عامہ کے بحران جیسے کہ کوویڈ 19 وبائی بیماری، 2014 کی مغربی افریقی ایبولا کی وبا، 2016 میں لاطینی امریکہ میں زیکا وائرس اور پولیو کے خاتمے کے لیے جاری کوششوں کے لیے ہنگامی حالات کا اعلان کیا تھا۔
