تہران: ایران میں "چہار شنبہ سُوری" نام کے تہوار کی تیاریوں کے دوران 15 افراد ہلاک اور 353 زخمی ہو گئے۔ زخمیوں میں سے 6 کی حالت نازک ہے۔ ایران میں ہجری شمسی تقویم کے مطابق سال کے آخری بدھ کی رات منائے جانے والے "چہار شنبہ سُوری" تہوار کی تیاریوں کے دوران اب تک ملک بھر میں 15 افراد ہلاک اور 353 زخمی ہو چکے ہیں۔ زخمیوں میں سے 6 کی حالت نازک ہے۔ ایران کی سرکاری خبر رساں ایجنسی اِرنا کے مطابق ایران ہنگامی حالات مرکز کے سربراہ جعفر میعادفر نے کہا کہ چہار شنبہ سُوری تہوار کی تیاریوں کے دوران تبریز، تہران، ہمدان، اورومیہ اور قزوین میں پیش آنے والے حادثات میں رواں مہینے کے دوران 15 افراد ہلاک ہو چُکے ہیں۔
- یہ بھی پڑھیں: Iran Schoolgirl Poisonings ایران میں اسکولی طالبات کو زہر دینے کے معاملے میں سو سے زائد افراد گرفتار
میعادفر نے کہا کہ پیش آنے والے حادثات میں 353 افراد زخمی ہوئے ہیں جن میں سے 49 کو ہسپتالوں میں داخل کروا دیا گیا ہے۔ زخمیوں میں سے 6 انتہائی نگہداشت یونٹ میں ہیں۔ انہوں نے کہا ہے کہ حادثات میں 51 افراد کے اعضاء کٹ گئے، 130 کے جسم پر جلنے کی زخم ہیں اور 86 کی آنکھیں زخمی ہوئی ہیں۔ سب سے زیادہ جانی نقصان تہران میں دیکھنے میں آیا ہے۔ واضح رہے کہ ایران میں جشنِ نوروز سے قبل سال کے آخری بدھ کی رات کو منائے جانے والے تہوارچہار شنبہ سُوری میں خاص طور پر بچے اور نوجوان آگ کے الاو کو پھلانگتے اور آتش بازی کرتے ہیں ۔ اس تہوار کی تیاریوں میں ہر سال ملک میں بیسیوں افراد ہلاک اور سینکڑوں زخمی ہو جاتے ہیں۔ ملک میں ہجری شمسی تقویم کے مطابق جشنِ نوروز 21 مارچ کو منایا جاتا ہے۔
یو این آئی
