انتاناناریوو: مڈغاسکر کے دارالحکومت انتاناناریوو کے باریا اسٹیڈیم میں 11 ویں انڈین اوشین آئی لینڈ گیمز کی افتتاحی تقریب کے دوران داخلی دروازے پر بھگدڑ مچنے سے کم از کم 12 افراد ہلاک اور تقریباً 80 زخمی ہوگئے۔ یہ اطلاع مڈغاسکر کے وزیر اعظم کرسچن اینٹسے نے دی۔ وزیر اعظم نے جمعہ کی شام میڈیا کو بتایا کہ بھگدڑ میں مرنے والوں کی تعداد 12 ہے اور تقریباً 80 افراد زخمی ہوئے ہیں جن میں سے 11 افراد کو فوری سرجری کی ضرورت ہے۔
وزیراعظم اینٹسے نے کہا کہ "حکومت زخمیوں کے طبی اخراجات برداشت کرے گی اور تمام اداروں کی جانب سے، میں متاثرین کے اہل خانہ سے تعزیت کا اظہار کرتا ہوں۔" مڈغاسکر کے صدر اینڈری راجویلینا نے مرنے والوں کے تئیں تعزیت کا اظہار کیا ہے۔ صدر نے اس واقعہ کو افسوسناک قرار دیا۔ انہوں نے کہا کہ اسٹیڈیم کے داخلی دروازے پر بھگدڑ مچ گئی تھی۔ جس کے سبب کئی لوگ زخمی ہیں۔ تعزیت کا اظہار کرتے ہوئے صدر نے خاموشی اختیار کرنے کی اپیل کی ہے۔ اس کے بعد افتتاحی تقریب میں صدرنے بھگدڑ میں ہلاک ہونے والوں کے لیے ایک منٹ کی خاموشی اختیار کی۔
مزید پڑھیں: السلواڈور کے فٹ بال اسٹیڈیم میں بھگدڑ، متعدد افراد ہلاک
قابل ذکر ہے کہ 26 جون 2019 کو، مڈغاسکر کی آزادی کا جشن منانے کے دوران مہاماسینا اسٹیڈیم میں بھگدڑ مچنے سے کم از کم 15 افراد ہلاک اور 75 دیگر زخمی ہوگئے تھے۔ اس سے پہلے بھی بھگڈر کے واقعات پیش آچکے ہیں جن میں متعدد افراد زخمی ہوئے تھے۔
