اسلام آباد: پاکستانی میڈیا کے مطابق پاکستان مسلم لیگ نواز (پی ایم ایل این) کے لیڈروں نے دعویٰ کیا ہے کہ چیف جسٹس عمر عطا بندیال کی سربراہی میں تین ججوں نے کیس کی سماعت کی۔ بنچ کی تشکیل سے ہی عدالت عظمیٰ کا فیصلہ متنازعہ ہوگیا۔ سابق وزیراعظم نواز شریف نے فیصلے پر مایوسی کا اظہار کرتے ہوئے ٹویٹ کیا کہ ملک ایک تھیٹر بن گیا ہے تینوں ججز کو سلام۔
وزیراعظم شہباز شریف نے کہا کہ سپریم کورٹ کے فیصلے سے عوام، قانونی برادری، درخواست گزاروں اور میڈیا کی انصاف کی امیدوں کو دھچکا لگا ہے۔ فیصلے کے بعد ایک ٹویٹ میں انہوں نے کہا کہ عدلیہ اور انصاف کا تقاضا ہے کہ فل بنچ کورٹ تشکیل دی جانی چاہیے تھی۔ انہوں نے کہا کہ فل کورٹ بنچ کی تشکیل کے ساتھ نہ صرف انصاف ہونا چاہیے بلکہ ایسا محسوس بھی ہونا چاہیے۔ پاکستان ڈیموکریٹک موومنٹ (پی ڈی ایم) کے سربراہ مولانا فضل الرحمان نے سپریم کورٹ کے فیصلے کو ’جمہوریت کا عدالتی قتل‘ قرار دیتے ہوئے اس پر بحث کے لیے جمعرات کو حکمران اتحاد کا اجلاس بلایا ہے۔
وزیراطلاعات مریم اورنگزیب نے کہا کہ سپریم کورٹ کا فیصلہ فل کورٹ کے قیام کی حکومتی درخواست کو خارج کرنے سے پہلے ہی متنازعہ ہوگیا ہے۔ انہوں نے کہا کہ عدلیہ کی آزادی کے حوالے سے مہم کا دوسرا مرحلہ شروع ہو گیا ہے، اس کا آغاز سب سے پہلے سابق وزیراعظم نواز شریف نے کیا تھا۔ مسلم لیگ (ن) کی نائب صدر مریم نواز نے ٹویٹ کیا، "عدالتی تختہ پلٹ"۔
یہ بھی پڑھیں:
New Punjab CM of Pakistan: پرویز الٰہی نے بطور وزیراعلیٰ پنجاب حلف لیا
وہیں دوسری جانب ٹوئٹر پر سابق وزیراعظم عمران خان Imran Khan نے کہا کہ 'میں اپنے سپریم کورٹ کے ججوں کو ہر طرح کی دھمکیوں اور بدسلوکی کے خلاف ثابت قدم رہنے اور آئین اور قانون کی پاسداری کرنے پر سراہتا ہوں'۔ انہوں نے سپریم کورٹ میں پی ٹی آئی کا مقدمہ لڑنے پر بیرسٹر علی ظفر اور ان کی ٹیم کا شکریہ ادا کیا۔ انھوں نے یہ بھی کہا کہ ضمنی انتخابات کے دوران غیرمعمولی تعداد میں دھاندلی کیخلاف نکلنے پر اہل پنجاب بھی تحسین وتشکر کےمستحق ہیں۔
واضح رہے کہ گزشتہ روز پاکستان سپریم کورٹ کی جانب سے پنجاب اسمبلی کے ڈپٹی اسپیکر دوست محمد مزاری کے حکم کے خلاف فیصلہ سنائے جانے کے بعد پاکستان تحریک انصاف (پی ٹی آئی) کی حمایت یافتہ پرویز الٰہی Pervez Elahi نے وزیراعلیٰ پنجاب کے عہدے کا حلف اٹھایا۔ چیف جسٹس پاکستان عمر عطا بندیال، جسٹس اعجاز الاحسن اور جسٹس منیب اختر پر مشتمل سپریم کورٹ کے تین رکنی بینچ نے ابتدائی طور پر گورنر پنجاب بلیغ الرحمان کو حکم دیا تھا کہ وہ پرویز الٰہی سے حلف لیں تاہم انہوں نے اپنی ذمہ داریاں ادا کرنے سے انکار کر دیا۔ جس کے نتیجے میں صدر مملکت عارف علوی نے ان سے حلف لیا۔
