G20 Meeting in Delhi جی ٹوئنٹی وزرائے خارجہ کی میٹنگ سے قبل جے شنکر کی روسی ہم منصب سے ملاقات

جمعرات کو نئی دہلی میں جی 20 کے اجلاس کے دوران جب دنیا بھر کے وزرائے خارجہ ملاقات کریں گے تو روس یوکرین تنازعہ بحث کا ایک اہم نکتہ ہوگا۔ وہیں بھارت آئے روسی وزیر خارجہ سرگئی لاوروف اور یورپی یونین کی خارجہ پالیسی کے سربراہ جوزپ بوریل سے جے شنکر نے ملاقات بھی کی۔

نئی دہلی: بھارت کی صدارت میں جی 20 وزرائے خارجہ کی میٹنگ سے پہلے، وزیر خارجہ ایس جے شنکر نے روسی وزیر خارجہ سرگئی لاوروف، یورپی یونین کی خارجہ پالیسی کے سربراہ جوزپ بوریل اور نائیجیریا کے وزیر خارجہ جیفری اونیاما سے ملاقات کی۔ روس کی وزارت خارجہ نے ٹویٹ کیا کہ وزیر خارجہ سرگئی لاوروف جمہوریہ ہند کے وزیر خارجہ ڈاکٹر سبرامنیم جے شنکر کے ساتھ ملاقات کر رہے ہیں۔ قابل ذکر ہے کہ جے شنکر جمعرات کو وزرائے خارجہ کی میٹنگ میں دو اجلاسوں کی صدارت کریں گے۔ خارجہ سکریٹری ونے کواترا نے کہا کہ پہلے سیشن میں کثیرالجہتی، اور خوراک اور توانائی سے متعلق مسائل پر توجہ دی جائے گی جبکہ دوسرے سیشن میں چار یا پانچ اہم مسائل پر توجہ مرکوز کی جائے گی، جن میں نئے اور ابھرتے ہوئے خطرات بشمول انسداد دہشت گردی اور منشیات، گلوبل اسکل میپنگ اور عالمی صلاحیت پولز پر توجہ دی جائے گی۔

جے شنکر کی یورپی یونین کی خارجہ پالیسی کے سربراہ جوزپ بوریل سے ملاقات

دریں اثنا، جے شنکر نے یورپی یونین کی خارجہ پالیسی کے سربراہ جوزپ بوریل سے بھی ملاقات کی۔ جے شنکر نے کہا کہ بوریل کے ساتھ بات چیت جی 20 ایجنڈا اور یوکرین تنازعہ پر مرکوز تھی۔انھوں نے ٹویٹ کیا کہ کل جی 20 میٹنگ سے پہلے یورپی یونین کی خارجہ پالیسی کے سربراہ جوزپ بوریل سے مل کر خوشی ہوئی۔ ہماری بات چیت G20 ایجنڈا اور یوکرین کے تنازعہ پر مرکوز تھی۔ بھارت یورپی یونین تعاون کی مسلسل ترقی کی تعریف بھی کی۔ واضح رہے کہ بھارت نے بدھ کے روز روس یوکرین تنازعہ پر اپنا موقف واضح کرتے ہوئے وزیر اعظم نریندر مودی کے اس بیان کی توثیق کی کہ یہ جنگ کا دور نہیں ہے۔ جی 20 وزرائے خارجہ کی میٹنگ پر ایک خصوصی بریفنگ میں بات کرتے ہوئے، خارجہ سکریٹری ونے کواترا نے کہا کہ روس یوکرین تنازعہ پر بھارت کا موقف ہے کہ یہ جنگ کا دور نہیں ہے۔ بات چیت اور سفارت کاری کو آگے بڑھانا چاہیے جیسے ایجنڈے وزرائے خارجہ کی میٹنگ میں اہم ہوں گے۔

کواترا نے کہا کہ جمعرات کو نئی دہلی میں گروپ آف 20 (جی 20) کے اجلاس کے دوران جب دنیا بھر کے وزرائے خارجہ ملاقات کریں گے تو روس یوکرین تنازعہ بحث کا ایک اہم نکتہ ہوگا۔ روس یوکرین کی صورتحال کے پیش نظر، قدرتی طور پر وزرائے خارجہ کی میٹنگ کے دوران یہ بحث کا ایک اہم نکتہ ہوگا۔ وزرائے خارجہ روس یوکرین کی صورتحال پر توجہ مرکوز کریں گے، یہ اہم ہو گا کہ وہ کیا بات کرتے ہیں، کیا مفاہمت تیار ہوتی ہے۔ انہوں نے مزید کہا کہ روس یوکرین تنازعہ کے دنیا پر پڑنے والے اثرات بشمول اقتصادی اثرات اور ترقی پر اثرات کے مسائل پر بھی اجلاس میں توجہ مرکوز کی جائے گی۔

جے شنکر کی نائیجیریا کے وزیر خارجہ جیفری اونیاما سے ملاقات

جے شنکر نے نائیجیریا کے وزیر خارجہ جیفری اونیاما سے بھی ملاقات کی اور گلوبل ساؤتھ اور افریقی یونین کے مفادات کے تئیں بھارت کی مضبوط وابستگی پر زور دیا۔انہوں نے ایم ٹی ہیروک اڈون کا مسئلہ بھی اٹھایا اور عملے کے ارکان کی جلد وطن واپسی پر زور دیا۔ جئے شنکر نے ٹویٹ کیا کہ آج سہ پہر نائجیریا کے وزیر خارجہ جیوفری اونیاما سے مل کر اچھا لگا۔ گلوبل ساؤتھ اور افریقی یونین کے مفادات کے لیے بھارت کی مضبوط وابستگی پر زور دیا۔ ہمارے دوطرفہ تعاون، خاص طور پر تعلیمی تبادلوں میں حالیہ پیش رفت کو نوٹ کیا۔ دونوں ممالک کے درمیان براہ راست پروازوں کا بھی خیرمقدم کیا۔

انھوں نے مزید لکھا کہ ایم ٹی ہیروک اڈون کا مسئلہ بھی اٹھایا اور عملے کے ارکان کی جلد وطن واپسی کے لیے دباؤ ڈالا۔ دراصل اس سال اگست کے بعد سے، تیل کے ٹینکر ایم ٹی ہیروک اڈون پر سوار 16 بھارتی ملاح، پہلے استوائی گنی اور اب نائجیریا میں، تیل چوری کے الزام میں اور دیگر الزامات کے ساتھ حراست میں ہیں۔