نیتن یاہو حکومت غزہ میں فلسطینیوں کو صفحہ ہستی سے مٹانا چاہتی ہے: برطانوی تاریخ دان

برطانوی تاریخ دان ولیم ڈال رمپل نے معروف صحافی مہدی حسن کے شو میں شواہد پیش کرتے ہوئے دعویٰ کیا کہ اسرائیلی حکومت، اس کے جنرلز اور وزرا غزہ کے لوگوں کو صفحہ ہستی سے مٹا دینا چاہتے ہیں یا پھر اُن کی نسل کشی کر کے اُنہیں صحرائے سینائی میں دھکیل دینا چاہتے ہیں۔ Historian William Dalrymple on Gaza War

لندن: برطانوی تاریخ دان ولیم ڈال رمپل نے کہا کہ نیتن یاہو حکومت غزہ میں فلسطینیوں کو صفحہ ہستی سے مٹادینا چاہتی ہے۔ اپنے سوشل میڈیا اکاؤنٹ پر امریکی صحافی مہدی حسن کے شو میں پیش کردہ شواہد شیئر کرتے ہوئے برطانوی تاریخ دان نے کہا کہ اسرائیلی وزیراعظم بن یامین نیتن یاہو، اس کے بیشتر جنرلز اور وزراء واضح طور پر غزہ کے لوگوں کو صفحہ ہستی سے مٹا دینا چاہتے ہیں یا پھر اُن کی نسل کشی کر کے اُنہیں صحرائے سینائی میں دھکیلنا چاہتے ہیں۔

انہوں نے صحافی کے پروگرام میں پیش کردہ شواہد کی جانب اشارہ کرتے ہوئے کہا کہ یہ اسرائیل کی موجودہ سول اور عسکری قیادت کے مصدقہ، انتہائی خوفناک بیانات اور ویڈیو کلپ ہیں۔انہوں نے مزید کہا کہ ان ویڈیوز میں غزہ پٹی کے فلسطینیوں کو مبینہ طور پر انسانی جانور کہا گیا ہے اور مقبوضہ پٹی کو زمین بوس کرنے کے ساتھ وہاں کے فلسطینیوں کی نسل کشی کی بات کی گئی ہے۔

ولیم ڈال رمپل کا کہنا تھا کہ ان شواہد کے بعد کسی کو بھی اسرائیل کے کسی بیان پر یقین نہیں کرنا چاہیے کہ وہ سویلین ہلاکتوں سے گریز کی ہر ممکن کوشش کر رہے ہیں، صرف مخصوص اہداف پر بمباری کر رہے ہیں، یا پھر اُس سے بھی بدتر یہ بیان کہ اسرائیلی فوج دنیا کی سب سے اخلاقی فوج ہے۔

یو این آئی