جنوبی افریقہ کے شہر ڈربن اور گرد و نواح میں طوفانی بارشوں نے تباہی مچادی ہے۔ Floods in South Africa غیر ملکی خبررساں ایجنسی کے مطابق جنوبی افریقہ کے شہر ڈربن اور مختلف علاقوں میں بارشوں کی وجہ سے سیلاب اور لینڈ سلائیڈنگ کے واقعات میں ہلاکتوں کی تعداد 259 تک پہنچ گئی جبکہ متعدد افراد اب بھی لاپتہ ہیں۔ اطلاعات کے مطابق پیر کی رات سے شروع ہونے والی بارشوں کے نتیجے میں کئی بستیوں میں سیلاب آ گیا جس نے کئی گھروں کو تباہ کر دیا، سڑکیں بہہ گئیں اور درجنوں افراد بے گھر ہو گئے۔
رپورٹوں کے مطابق جنوبی افریقہ کے صدر سائرل رامافوسا نے سیلابی بارشوں کو موسمیاتی تبدیلی کا نتیجہ قرار دیتے ہوئے کہا ہے کہ ’’دنیا اس تبدیلی سے نمٹنے میں اب مزید تاخیر کی متحمل نہیں ہو سکتی'‘۔ دوسری جانب جنوبی افریقی محکمہ موسمیات نے بارش کی موجودہ رفتار کو موسمیاتی تبدیلی قرار دینے سے انکار کیا اور کہا کہ اس طرح کی شدید بارشیں عام نہیں ہوسکتی ہیں۔ اس کے علاوہ حکام نے ڈربن میں مزید طوفانی بارشوں کی پیش گوئی بھی کی ہے جس سے سیلاب کا بھی خطرہ ہے۔
وہیں فلپائن میں گزشتہ ہفتے کے آخر میں شروع ہونے والے 'میگی طوفان Storm Maggie in the Philippines سے مرنے والوں کی تعداد بڑھ کر 121 ہو گئی ہے، جن میں سے 81 افراد وسطی فلپائن میں لینڈ سلائیڈنگ میں دب گئے ہیں۔ طوفان کی وجہ سے وسطی فلپائن میں 118 اور جنوبی فلپائن میں تین اموات ہوئیں، حالانکہ نیشنل ڈیزاسٹر رسک ریڈکشن اینڈ مینجمنٹ کونسل نے اب تک صرف 76 افراد کی ہلاکت اور 29 لاپتہ ہونے کی اطلاع دی ہے۔کونسل نے ہلاکتوں کی تصدیق کی ہے۔
مشرقی ویزاس علاقے میں نیشنل پولیس کے ترجمان پولیس کرنل ایم اے بیلا رینٹوا نے بتایا کہ جمعرات تک علاقے میں لینڈ سلائیڈنگ اور سیلاب سے 113 افراد ہلاک ہو چکے ہیں۔انہوں نے ایک رپورٹ میں کہا کہ مٹی کے تودے گرنے سے بیبے شہر میں 81، صوبہ لیت کے شہر ابویوگ میں 31 اور صوبہ سمر میں ایک شخص ہلاک ہوا۔ طوفان میں پانچ افراد لاپتہ ہیں اور کم از کم 236 زخمی ہوئے ہیں۔
گزشتہ اتوار کو شروع ہونے والا سمندری طوفان میگی فلپائن سے ٹکرانے والا سال کا پہلا طوفان ہے۔ ملک ہر سال تقریباً 20 سمندری طوفانوں سے متاثر ہوتا ہے۔ فلپائن کا جزیرہ نما بحرالکاہل ٹائیفون کی پٹی پر واقع ہے، جو اسے دنیا کے سب سے زیادہ تباہی کا شکار ممالک میں سے ایک بناتا ہے۔
