افریقی ملک الجزائر (Algeria) کے صدر عبد المجید تے بون نے اپنے ملک اور ترکی کے مابین مسافروں اور تجارتی سامان کی آمدورفت کو آسان بنانے کے لئے بحری نیویگیشن معاہدے کی منظوری دے دی۔
ترکی میڈیا رپورٹ کے مطابق عبدالمجید تے بون کے دستخط شدہ صدارتی فرمان کو کل سرکاری گزٹ میں شائع کیا گیا تھا۔ طے پانے والے معاہدے کی رو سے دونوں ممالک کے درمیان جہازوں کی تعمیر اور مرمت کے ساتھ ساتھ بندرگاہ کی تعمیر میں بھی تکنیکی تعاون کیا جائے گا۔
اگرچہ دونوں ممالک کے مابین مسافروں کی آمدورفت اور تجارتی حجم میں اضافے سے متعلق معاہدے پر 25 مئی 1998 کو دستخط کیے گئے لیکن الجزائر کی حکومت نے اسے آج تک منظور نہیں کیا تھا۔
واضح رہے کہ ترکی اور الجیریا کے مابین تجارتی حجم 3.5 سے 4.2 بلین ڈالر کے درمیان ہے، دونوں ممالک کے عہدیداروں کا کہنا ہے کہ وہ اس رقم کو 5 ارب ڈالر تک بڑھانا چاہتے ہیں۔
بدھ کے روز فرانسیسی جریدے لی پوائنٹ کو انٹرویو دیتے ہوئے صدرتے بون نے کہا کہ ان کے ملک کے ترکی کے ساتھ بہترین تعلقات قائم ہیں اور ترکی نے بغیر کسی سیاسی مطالبے کے بدلے تقریبا 5 5 ارب ڈالر کی سرمایہ کاری کی ہے۔
(یو این آئی)
