ایران پر پابندی لگانے سے سلامتی کونسل کا انکار

امریکہ نے ایران پر مزید سخت پابندی لگانے کا سلامتی کونسل سے مطالبہ کیا تھا۔

اقوام متحدہ کی سلامتی کونسل (یو این ایس سی) نے بدھ کے روز کہا کہ وہ ایران کے خلاف مزید سخت (اسنیپ بیک) پابندیاں عائد کرنے کے امریکی مطالبہ پر مزید کارروائی کرنے کی پوزیشن میں نہیں ہے۔

اقوام متحدہ میں انڈونیشیا کے سفیر ڈیان ٹریانسیاہ جانی نے مغربی ایشیا پر کونسل کے ہونے والے اجلاس کے دوران روس اور چین کے ایک سوال کے جواب میں مذکورہ باتیں کہیں۔ خیال رہے کہ انڈونیشیا اگست سے سلامتی کونسل کی سربراہی کر رہا ہے۔

ڈیان ٹریانسیاہ جانی نے اقوام متحدہ میں امریکی سفیر کیلی کرافٹ پر برہمی کا اظہار کیا جنہوں نے ان پر 'شدت پسندوں' کی حمایت کرنے کا الزام عائد کیا تھا۔

امریکی سفیر نے جانی کے تبصرے کے بعد کہا کہ 'مجھے واقعتاً اسے واضح کرنے دیں، ٹرمپ انتظامیہ کو اس معاملہ میں محدود لوگوں سے ملنے کا کوئی خوف نہیں ہے۔ مجھے صرف اس بات کا افسوس ہے کہ اس کونسل کے دیگر ممبران اپنا راستہ کھو بیٹھے ہیں اور اب وہ خود کو شدت پسندوں کے ساتھ کھڑا پا رہے ہیں۔'