آمد و رفت کے ذرائع کو بہتر کرنے، ٹرانسپورٹ کی پالیسی میں اصلاح اور ٹیکنالوجی کے مثالی استعمال نے ٹریفک کنٹرول کی صلاحیت کو یقینی بنانے میں اہم کردار ادا کیا ہے جس کی وجہ سعودی عرب میں ٹریفک حادثات میں نمایاں کمی آئی ہے۔
عرب میڈیا کے مطابق سعودی عرب کے وزیر داخلہ شہزادہ عبدالعزيز بن سعود بن نائف نے کہا ہے کہ گذشتہ برسوں کے دوران مملکت میں بڑے ٹریفک حادثات میں 34 فیصد اور ٹریفک حادثات میں اموات کی تعداد میں 51 فیصد کمی آئی ہے۔
پہلے ایک لاکھ افراد میں سے ٹریفک حادثات کے سبب 28 افراد ہلاک ہوجاتے تھے جبکہ کچھ عرصہ قبل یہ اوسط ایک لاکھ میں 13.5 اموات تک نیچے آ گئی ہے۔
میڈیا رپورٹ کے مطابق وزیر داخلہ کے مطابق ٹکنالوجی کے مثالی استعمال نے ٹریفک کنٹرول کی صلاحیت کو یقینی بنانے میں اہم کردار ادا کیا ہے۔ مملکت کے پروگرام ویژن 2030 کے اہداف میں سعودی حکومت نے ٹریفک کی سلامتی کو خصوصی ترجیح دی ہے۔
ٹویٹر پر اپنی پوسٹ میں وزیر داخلہ نے باور کرایا کہ 2016ء سے 2019ء کے درمیانی عرصے میں ٹریفک حادثات میں کمی اور اس کے مثبت نتائج سے تقریبا 6 ارب ریال کا بوجھ کم ہوا جو ان حادثات کی مد میں خرچ ہوتے تھے۔
ٹریفک سیفٹی کے نئے نظام کے فعال ہونے سے گذشتہ تین برسوں کے دوران ٹریفک کے حادثات میں 46 فیصد کمی آئی ہے۔ اسی طرح ٹریفک ضابطوں کی خلاف ورزیوں کا تناسب بھی 54 فیصد کم ہوا۔
(یو این آئی)
