قطر ایئرویز نے ٹویٹ کر کے جانکاری دی ہے کہ وہ 11 جنوری سے الریاض، 14 جنوری سے جدہ اور 16 جنوری سے دمام کے لیے پروازیں شروع کرے گا۔ اس نے مزید کہا ہے کہ وہ سعودی عرب کے ان شہروں کے لیے اپنے بڑے طیارے چلائے گا۔ ان میں بوئنگ 777-300، بوئنگ 787-8 اور ایئربس اے 350 شامل ہیں۔
قطری کمپنی نے مزید کہا ہے کہ ’ہم سعودی عرب میں اپنے تجارتی اور کاروباری شراکت داروں کے ساتھ مضبوط تعلق داری کے خواہاں ہیں۔ اس کے علاوہ مملکت کے بڑے ہوائی اڈوں کے ساتھ بھی مضبوط تعلقات کے خواہاں ہیں'۔
سعودی ایئرلائنز (السعودیہ) نے بھی ایک ٹویٹ میں پیر سے الریاض اور جدہ سے دوحہ کے لیے پروازیں بحال کرنے کی اطلاع دی ہے۔
یہ بھی پڑھیں: انڈونیشیا: تودہ گرنے سے 13 افراد ہلاک، 18 زخمی
سعودی عرب نے چار جنوری کو قطر کے ساتھ واقع اپنی فضائی، برّی اور بحری سرحدیں دوبارہ کھولنے کا اعلان کیا تھا۔ پانچ جنوری کو سعودی عرب کے شہر العُلا میں منعقدہ خلیج تعاون کونسل ( جی سی سی) کے سربراہ اجلاس میں سعودی عرب سمیت چار عرب ممالک نے قطر کے ساتھ جاری تنازع کے خاتمے کا اعلان کیا تھا اور کہا تھا کہ ان کے قطر کے ساتھ تمام شعبوں میں تعلقات بحال ہوگئے ہیں۔
اس ضمن میں ان ممالک اور قطر کے درمیان دوبارہ تعلقات کی بحالی کے لیے العُلا میں ایک سمجھوتا طے پایا تھا۔ اس کے بعد قطر ائیرویز نے گذشتہ جمعرات کو سعودی عرب کی فضائی حدود سے اپنے طیارے گزارنے کا اعلان کیا تھا۔
