گذشتہ ماہ سعودی عرب کی تیل تنصیبات پر ڈرون حملوں کے بعد شاہ سلمان نے ملک میں ضروری فوجی آلات کے ساتھ اضافی امریکی فوج تعینات کرنے کی منظوری دی تھی۔
اس معاملے میں سعودی خبر رساں ایجنسی کا کہنا ہے کہ اضافی امریکی فوج اور فوجی آلات کی تعیناتی دراصل خطے میں امن برقرار رکھنے کے لیے دونوں میں (امریکہ اور سعودی عرب) کی کاوشوں کا حصہ ہے۔
مزید یہ بھی بتایا گیا ہے کہ یہ دفاعی اقدام خطے کی امن و استحکام اور عالمی معیشت پر منڈلارہے خطرات کا مقابلہ کرنے کے لیے سعودی عرب اور امریکہ کے درمیان مشترکہ لائحہ عمل کے تناظر میں اٹھائے جا رہے ہیں۔
واضح رہے کہ گزشتہ جمعہ کو تین ہزار اضافی امریکی فوجیوں اور فوجی سازوسامان کو سعودی عرب میں بھیجنے کی منظوری کی تصدیق کی گئی تھی۔
سعودی عرب میں دو مزید پیٹریاٹ میزائل بیٹریز، ایک تھاڈ بیلسٹک میزائل دفاعی نظام کی تنصیب، دو لڑاکا اسکواڈرن اور فضائیہ کے ایک ونگ کو بھیجنے کی منظوری دی گئی تھی۔
